Emnet Innføring i programmering gir ei innføring i grunnleggjande prinsipp og teknikkar for programmering ved bruk av tekstbasert programmeringsspråk, spesielt tilpassa undervisning i skulen. Emnet tek sikte på å gi lærarar og pedagogar ei god forståing for ulike aspekt knytte til tekstbasert programmering, slik at dei kan introdusera og rettleia elevar i grunnleggjande programmering.

Sentrale tema i emnet er algoritmisk tenking, tekstbasert programmering og didaktiske metodar for å undervise i programmering. I det praktiske arbeidet blir det gitt høve til å fokusere på ønska trinn og fag.

Målgruppa for emnet er lærarar i grunnskulen og andre som ønsker å bruke tekstbasert programmering i undervisninga si. Studiet har tett fagleg oppfølging, tilbakemeldingar og diskusjonar, og gir høve til samarbeid eller individuelt læringsarbeid etter eige ønske. Til eksamen leverer kvar student ei eksamensmappe, basert på arbeidskrava i emnet.