Førstelektor

Kompetanseheving

Kompetanseheving er viktig for Høgskulen i Volda, og høgskulen vil setje eit fokus på å hjelpe fleire i retning av førstelektorkompetanse gjennom ordninga Førstelektorkvalifisering. 

Kompetanseheving er eit viktig reiskap i arbeidet med å møte endra krav og forventningar, realisere dei strategiske ambisjonane og målsettingane til Høgskulen i Volda og å kome i møte den einskilde fagtilsette sitt behov og ønskje om eigenutvikling. 

Kvalifiseringsordninga mot førstelektorkompetane vil vere eit tilbod til fagtilsette ved Høgskulen i Volda som ønskjer opprykk frå stilling som høgskulelektor til førstelektor.

Kvalifiseringsordninga har som mål å medverke til auka fagleg og kollegialt samarbeid og kompetanse innan utdanning, utviklingsarbeid og forsking. 

Hovudmål for kvalifiseringsrordninga mot førstelektorkompetanse:

- Å gje eit tilbod til faglege tilsette som er på god veg/i sluttfasen til å kunne søkje om opprykk til førstelektor

- Å medverke til kompetanseutvikling til førstelektor som ein alternativ karriereveg til førsteamanuensis

- Å medverke til institusjonen sitt mål om fleire fagtilsette med førstestillingkompetanse

- Å legge til rette for institusjonen sitt behov for forskingsbasert undervisning og praksisretta forsking knytt til utdanningsprogram som høgskulen gjev tilbod om

- Å medverke til å styrkje forskinga og utdanningskvaliteten ved Høgskulen i Volda

Kvalifiseringsordninga vil legge til rette for nettverksbygging og erfaringsutveksling mellom fagtilsette på tvers av Høgskulen i Volda. 

Medlemmar i referansegruppa for kvalifiseringsordninga ved Høgskulen i Volda (2022): Prorektor/førstelektor Odd Helge Mjellem Tonheim (leiar), prodekan utdanning/førstelektor Silje Ims Lied, dosent Birgitte Fondevik, førstelektor Gro Anita Bårdseth, førstelektor Steinar Høydal, forskingsrådgivar Geir Tangen (administrativ koordinator).

Om krav til ansettelse og opprykk

Krav til dei ulike stillingskategoriane finn ein i Forskrift om ansettelse og opprykk i undervisnings- og forskerstillinger. Ifølgje forskriften skal ein førstelektor dokumentere omfattande forskings- og utviklingsarbeid/kunstnarleg utviklingsarbeid som i kvalitet og omfang svarar til arbeidsmengde og nivå for ei doktorgrad. Vidare skal det leggast stor vekt på kvalifikasjonar innanfor undervisning eller annan pedagogisk verksemd. Førstelektorkvalifiseringa vil ha fokus på kva ein førstelektor er, kva kompetanse ein førstelektor har og korleis ein kan kome seg dit. Vidare vil ein også sjå litt på kva som er skilnad på dosent-løypa og professor-løypa.