Master i barnehagekunnskap startar opp i november

Alt er på plass med den heilt nye masteren i barnehagekunnskap og du kan søke plass på den deltidsbaserte utdanninga no. Søknadsfrist er 1. november og første samling 23. november.

– Vi er stolte over å ha alt på plass og no er vi veldig klare og gler oss til å ta imot studentar, smiler Bente Vatne, programansvarleg for Master i barnehagekunnskap.

Målgruppa for studiet er barnehagelærarar, men også grunnskulelærarar, faglærarar med Praktisk pedagogisk utdanning (PPU) med relevant fagkrets og barnevernspedagogar kan søkje om opptak, fortel dosent Bente Vatne.

HER KAN DU SØKE OM OPPTAK OG LESE MEIR OM UTDANNINGA. Søknadsfrist 1. november 2020.

Den nye masteren er på deltid og går over 9 semester (4,5 år), med 15 studiepoeng i kvart semester. Undervisninga er samlingsbasert med 4-5 samlingar i halvåret, der kvar samling normalt varer i 2 dagar. Første samling vil starte 23. november i Volda og første eksamen vil vere 3. og 4. juni.

Styrkar innhaldet i barnehagen

Vatne meiner behovet for mastergraden er tydeleg.

– Det er ingen mastergrader som er retta mot barnehagefeltet mellom Trondheim og Bergen. Det var også svært gledeleg at det var mange interesserte som tok kontakt då masteren vart godkjent i sommar. Vi ønsker å styrke kompetansen i barnehagane med denne nye utdanninga. På den måten vil også innhaldet i barnehagen verte betre, påpeiker Vatne.

Ved sidan av jobb

Studiet inneheld fire emne i tillegg til vitskapsteori og metode, og masteroppgåva. Emna er Barnehagelærarrolla i eit profesjonsperspektiv, Barnehagen som lærande organisasjon, Barnehagens læringsmiljø og Utforsking i barnehage og nærmiljø. Utdanninga vektlegg perspektiv både på samfunnet, profesjonen og barna, og dei samarbeidande faga er pedagogikk, realfag og norsk.

Studentane vil møte varierte arbeidsmåtar gjennom studiet. Studentaktive læringsformer og digitale læringsplattformer som Canvas, Zoom og Teams vil bli nytta. Det vert gjennomført arbeid i grupper, seminar med presentasjonar og tilbakemelding på tekst, case m.m.

– Det er lagt opp til at ein skal kunne ta studiet samstundes som ein er i jobb, fortel Vatne.

Godskriving av tidlegare emne

Etter ei individuell vurdering er det mogleg å få godskrive emne frå andre høgskular/universitet som delar av studiet. Studentar med til dømes vidareutdanning i rettleiing/mentorutdanning (30 stp) og styrarutdanning (30 stp) etter tidlegare ordningar, eller med anna relevant utdanning kan søkje om slik godskriving.

For spørsmål om master i barnehagkunnskap, kontakt Bente Vatne: bente.vatne@hivolda.no tlf: 700 75 356