Organisering, ansvar og medverknad
For studentar
Dine rettar og plikter som student
Som student har du eit medansvar for utviklinga av studiekvaliteten på høgskulen. Dine rettar og plikter som student følgjer av Lov om universiteter og høyskoler, og Forskrift om opptak, studium og eksamen ved Høgskulen i Volda. Du har eit ansvar for å setje deg inn i gjeldande reglar ved Høgskulen i Volda.
Innanfor dei rammene som er lagt, har du som student også ei plikt til å medverke. Medverknad betyr i dette tilfellet at du skal kunne sei di meining, delta og ha innverknad på det som angår deg på høgskulen. Dette kan gjerast på ulike måtar. Du kan oppsøkje tradisjonelle kanalar, som kvalitetsutvalet på emnet/studieprogrammet ditt, den tillitsvalde i klassa di, eller Studentparlamentet. Du kan også ta direkte kontakt med studentrepresentanten som sit i Høgskulestyret. Andre kanalar å medverke på, er gjennom emneevalueringa (spørjeundersøkinga) på emnet ditt. Der kan du gi ris og ros, og kome med forslag til forbetringar på emnet ditt.
Under finn du informasjon om kven du kan ta kontakt med for faglege spørsmål, medverknad og dersom du skulle trenge hjelp.
Forum/kontaktpersonar for faglege spørsmål og medverknad
Kvalitetsutvalet
Som kvalitetsutvalsmedlem skal du bidra til undervegsevaluering av emnet/studieprogrammet ditt. Du bidreg i kvalitetsutvalet på vegne av studentane på ditt emne/studieprogram. Kvalitetsutvalet skal vere eit forum for tilbakemeldingar og evaluering undervegs i studiet, og har samstundes som mål at studentar og faglærarar skal utvikle ei fagkritisk haldning.
Alle fleirårige studieprogram (bachelor- og masterprogram) skal ha kvalitetsutval, der studentar frå alle kull/årstrinn er med. Det er valfritt å organisere andre kvalitetsutval, uavhengig av studietype/studielengd. For nettstudentar skal det vere eigne evalueringsopplegg, og det må gå tydelig fram av studieplanen.
Sjå retningsliner for kvalitetsutval for utfyllande informasjon.
Studentrådet (tillitsvalde studentar)
Alle studieprogram ved Høgskulen (årsstudium, bachelor- eller masterprogram) som gir 30 studiepoeng eller meir i semesteret, vel tillitsvalde. Vervet varer eit studieår, og består i å arbeide for å ivareta studentane sine interesser. Som tillitsvald er ein talerør for sitt studium/sin klasse i studierelaterte saker, slik som studiekvalitet og praktisk gjennomføring av studiet.
Som tillitsvald sit du i Studentrådet, som er dei tillitsvalde sitt eige forum, leia av Studentparlamentet. I tillegg er det på dei fleste avdelingar slik at dei tillitsvalde også sit i kvalitetsutval. Unntaket er avdeling for humanistiske fag og lærarutdanning.
www.hivolda.no/stiv/tillitsvalde
Studentparlamentet
Studentparlamentet er det øvste organet i studentdemokratiet i Volda, og er bindeleddet mellom studentane og leiinga ved høgskulen. Studentparlamentet arbeider for å betre studiekvardagen ved Høgskulen og sikre studentane sine interesser og rettar, både fagleg og sosialt. Studentparlamentet fattar vedtak og tek avgjersler som vedkjem alle studentane ved Høgskulen. Studentparlamentsmøta er opne for alle studentar.
Studentparlamentet er også paraplyorganisasjon for alle studentorganisasjonane ved Høgskulen, og har ansvar for dei tillitsvalde.
Høgskulestyret
Høgskulestyret er det øvste organet ved institusjonen. Styret har følgjande medlemmar: rektor, prorektor, to medlemmar valde blant tilsette i undervisnings- og forskarstilling, ein medlem valt blant dei teknisk og administrativt tilsette, to medlemmar valde blant studentane og fire eksterne medlemmar. Rektor er styreleiar.
https://www.hivolda.no/om/hogskulestyret
Emneansvarleg
Emneansvarleg har ansvar for kvalitetsutvikling på emnet sitt. Ta kontakt med emneansvarleg for spørsmål om emnet ditt.
Programansvarleg/studieleiar
Programansvarleg/studieleiar har ansvar for kvalitetsutvikling på studieprogrammet sitt. Ta kontakt med programansvarleg/studieleiar for spørsmål om studieprogrammet ditt.
Dekan
Dekanen er fagleg leiar på avdelinga. Dekan har det overordna ansvaret for kvalitetsarbeidet på avdelinga, og for å fremje kvalitetskultur. Det er dekanen som har ansvaret for at evalueringar av undervisninga vert gjennomført, og for at resultata av evalueringane vert drøfta i relevante fora.
Vil du engasjere deg meir?
Vi oppmodar tillitsvalde til å engasjere seg i dei ulike råda og utvala der studentar er representerte. Dette arbeidet er svært lærerikt, og vil også telje positivt på CV-en. Val av studentrepresentantar til dei fleste ulike utvala finn stad på det første studentparlamentmøtet i studieåret.
Nemder: Skikkanemnda, Forskingsutvalet, Klagenemnda, Læringsmiljøutvalet, Utdanningsutvalet, Tilsetjingsutvalet for undervisnings- og forskingsstillingar (TUFO), Internasjonalt utval, Styret til Studentsamskipnaden i Volda
Når du treng hjelp
Studentsørvis kan svare på generelle spørsmål om studiet, saker du lurer på, eksamen, klagesaker, vegvisning, studierettleiing, tilrettelegging m.m.
Kontakt Studentsørvis:
70 07 50 18 | studentsorvis@hivolda.no
eller kom innom i opningstida:
- måndag - fredag kl. 08.00 - 15.30
Du finn Studentsørvis i 1. etasje i Berte Kanutte-huset
Studentrådgivaren på Studentsamskipnaden
Du kan ta kontakt med studentrådgivaren for personlege spørsmål, og om alt som verkar inn på kvardagen din. Studentrådgivar hjelp også til med søknadar til NAV, lege m.m. Studentrådgivaren har teieplikt.
Kontakt studentrådgjevar Eli Anne:
Telefon: 70 07 51 88
Mobil: +47 992 37 980
eli@sivolda.no
Du finn studentrådgjevaren i SiVolda sine lokale i Elvegata 24.
Kontortid: måndag, tysdag, onsdag og torsdag kl. 09.00 - 15.00.
Studentparlamentet er det øvste organet i studentdemokratiet ved Høgskulen i Volda. Studentparlamentet er bindeleddet mellom studentane og leiinga ved Høgskulen. Dei arbeider for å betre studiekvardagen ved Høgskulen og sikre studentane sine interesser og rettar, både fagleg og sosialt.
Har du spørsmål eller lurer på noko? Kom innom kontoret i første etasje på Berte Kanutte, eller ta kontakt med arbeidsutvalet eller organisasjonskonsulenten til Studentparlamentet.
Åpningstid: 09.00 – 15.00
Tlf: 70 07 51 51
E-post: studentparlamentet@hivolda.no
Dersom det skjer uheldige hendingar ved høgskulen, må du melde frå på sei i frå!. Der kan du sei i frå om saker du synst er vanskeleg å ta opp med dei nærast deg på studiet (faglærar, emneansvarleg, praksislærar, dekan), eller ta vidare saker om du har sagt i frå om noko viktig og ikkje har vorte høyrt. Ta kontakt med desse personane:
- Studentrådgivar for å sei i frå om mobbing, (seksuell) trakassering, eller andre uønskte opplevingar. Ho har teieplikt, og ingenting vert grunnlag for vidare saksgang, utan at ho har klarsignal frå deg.
- Driftssjef Øystein Søvik Mårstøl om vesentlege manglar ved det fysiske miljøet.
- Studiedirektør Ann Kristin Emblem om undervisningskvalitet og læringsmiljø.
På sikresiden.no vert det gitt forebyggande opplæring og råd om kva du skal gjer i ein krisesituasjon. Du må alltid sjølv vurdere kva som er best å gjer i ein konkret situasjon.