Gode studievanar for nettstudentar

Sett deg inn i reglane frå Lånekassen før du søkjer om lån og stipend.

Sett deg godt inn i kva utdanninga di går ut på - då er du førebudd på tøffe tak når du må gjennomføre emne eller tema som du kanskje ikkje finn like interessante.

Finn pensum på biblioteket nært deg (via fjernlån), eller ved å kjøpe pensumbøker brukt eller på fagbokhandelen nærast deg

• Lag deg delmål for studiet som er tilpassa studieplanen/leseplanen til føreleserane. Då er du førebudd til undervisninga og til innleveringane.
• Ha ein plan for arbeidet med innleveringane, og sett deg små mål fram til innleveringa, t.d. «i dag skal eg skrive x antal sider av denne innleveringsoppgåva».
• Planlegg meir tid på lesing og oppgåver – dei fleste overvurderer ofte sine eigne evner i byrjinga av studiet. Hugs at du skal oppleve meistring og framgong, og då må gjeremåla dine vere overkomelege!

• Kom deg tidleg opp, et frukost og kle deg som om du skal på arbeid. Prøv å ha ei fast studietid. Studerer du fulltid, bør studiearbeidet minimum tilsvare ei ordinær arbeidsveke.
• Sett deg delmål for dagen, og ikkje gjer noko anna før dei er gjennomført. Då kan du ta fri med godt samvit etterpå!
• Prøv å unngå skippertak – les heller «litt» kvar dag dei periodane motivasjonen er låg.

• Still deg sjølv spørsmåla «kvifor starta eg på studiet, og kva drøymer eg om?». Dersom du har eit stort overordna mål kan det vere lettare for deg å nå delmåla dine. 
• Finn den studieteknikken som passar deg best
• Ha ei nysgjerrig innstilling – og tenk positivt om det å tileigne seg ny kunnskap. Når motivasjonen er låg, prøv å hugs kvifor du ville dette.
• Gjer «kontoret» ditt koseleg – det skal vere kjekt å setje seg ned med studiet! Gjer lesing til noko hyggeleg – tenn lys, kok deg ein kopp kaffi og ha det triveleg rundt deg.

Ta til deg råd og konstruktiv kritikk frå dine medstudentar og lærarar. Gi faglege råd til medstudentar når du kan det, og spør om hjelp ved behov.

Ta deg gode pausar der du ikkje tenkjer på studiet. Det er viktig å kople av for å kunne kople seg på att! Når du tek deg pauser i eksamenstida, kan du slå to fluger i ein smekk ved å gå turar eller trene saman med vener. Då får du mosjonert samstundes som du er sosial. Begge deler er stressdempande, og verkar positivt på læringa di.

• Fordjup deg i dei vanskelege delane av pensum, og ikkje gi deg før du har forstått dei. Søk andre kjelder for å sjå om du får ei betre forståing for temaet der. Hugs å vere kjeldekritisk, ikkje all informasjon på veven bør slukast rått!
• Det kan vere lurt å løyse tidlegare eksamensoppgåver, då kan du få innsyn i kva forventingar lærarane har til kva du skal kunne.
• Ver ferdig med å lese pensum mellom to og fire veker før eksamen. Då får du tid til å repetere dei siste vekene.