Kjeldeliste (litteraturliste)

På slutten av dokumentet skal det vere ei kjeldeliste/litteraturliste. Føremålet med kjeldelista er å hjelpe lesaren med å finne dei same kjeldene som du har brukt. Med nokre få unntak (bla. personleg kommunikasjon), skal alle kjeldene førast opp.

Hugsereglar:

Kjeldelista startar på ei ny side.
Bruk Litteraturliste, Kjeldeliste eller Referanseliste som overskrift.
Ved kjelder som vert skrivne over fleire linjer, skal alle linjene ha innrykk så nær som den første.
Lista skal ordnast alfabetisk etter forfattarane sine etternamn.
Ved fleire medforfattarar skal lista alfabetiserast etter første forfattar (dvs. etter etternamnet på den forfattaren som er ført opp først i referansen).
Dersom ein forfattar har skrive fleire verk, skal dei ordnast kronologisk med eldste årstal først.
Dersom ein forfattar har skrive fleire verk same år, brukar ein a, b, c, etter årstalet for å skilje arbeida.
Dersom personleg forfattar manglar, kan ein institusjon/organisasjon fungere som forfattar.
Der det ikkje er nokon forfattar i det heile, brukar ein tittel som ordningsord.
Lover og forskrifter skal setjast opp etter korttittel.
Hugs at det skal vere samsvar mellom tilvisingane og litteraturlista. All litteratur som er referert eller sitert i teksten skal vere med i litteraturlista. Det skal heller ikkje stå noko i litteraturlista som det ikkje er referert til i teksten.