Studentane vil vere inndelt i praksisgrupper på 3-4 studentar. Praksisgruppa vil normalt vere på ein praksisskule gjennom heile studieåret. Praksisen i tredje studieåret vert delt inn i to utplasseringsperiodar, eventuelt med innslag av nokre få dagar punktpraksis. Det kan bli aktuelt med skuleovertaking eller stegovertaking i den andre praksisperioden. I forkant og i etterkant av praksisperiodane vil det verte sett av tid til førebuing og etterarbeid. Målsetjinga med desse dagane er å knytte undervisninga i dei ulike faga på høgskulen sterkare i samanheng med det studentane møter i praksis.I tredje studieår vil ein arbeide vidare med lærar- og elevrolla, som var hovudtema fyrste og andre studieår, men ein vil gå meir i djupna på skulen som organisasjon, det profesjonelle fellesskapet og samarbeid med føresette og sentrale instansar utanfor skulen. Praksislærar skal framstå som tydleg rettleiar og rollemodell. Praksislærar skal også vise studentane korleis ho/han gjennomfører undervisningsøkter. Gjennom denne vekslinga i ulike måtar å organisere rettleiinga på, får studentane spegla seg sjølv gjennom andre, og reflektert saman med andre om korleis deira lærarolle verkar på elevane og elevane si læring. Studentar skal i grupper og individuelt ta ansvar for undervisningsøkter og andre delar av læraryrket.I økter studenten ikkje har hovudansvar for, skal studenten gjennom observasjon og rettleiing av elevar prøve å setje seg inn i kva eleven si oppleving og utbytte av undervisninga er, i tillegg til å observere og rettleie medstudentar som underviser. I enkelte økter bør studenten også gjennomføre samtale med enkelt elevar der ein prøver å få enno betre innsikt i elevane sine erfaringar og læring. Det er viktig at studentar som observerer undervisinga til ein medstudent er aktive i rettleiingssamtalen i etterkant.Studentar øver seg på å oppnå kontakt med, og bygge relasjonar til einskildelevar, til dømes i friminutt og i andre aktivitetar der dette er naturleg.I løpet av praksisperiodane kan det verte aktuelt for studentane å arbeide med datainnsamling i samband med bacheloroppgåva i pedagogikk og elevkunnskap. Etterarbeid etter praksis:Dei ulike faga brukar erfaringar studentar og faglærarar har frå perioden inn mot si undervisning. Studenten skal reflektere over eigne sterke og svake sider – og utfordringar i høve undervisning. Dette skal gjerast inn mot alle fag studenten har.