KOH1-110KFK Kunst og handverk 1-10, Trearbeid i framtidsskulen, Kompetanse for kvalitet
Ingen.
Emnet er eitt av to emne i studieprogrammet Kunst og handverk 1, 1-10, Kompetanse for kvalitet.
Studiet skal vidareutvikle studenten som utøvar i, og formidlar av, skulefaget Kunst og handverk, og har som mål å gje konkret og praksisnært læringsutbytte. I emne utforskar ein koplingane mellom fysisk naturmateriale og digital teknologi. Gjennom øving av teknikkar, praktisk utforsking og problemløysing, skal studenten utvikle materialforståing og handlag innan materialområdet tre. Bruk og gjenbruk av materialar gjev grunnlag for å utvikle ein etisk og miljømedviten undervisningspraksis. Studiet skal førebu studenten i å leie elevane i opne og utforskande prosessar, men og i stegvise prosessar med nytenking som mål. Koplinga til lokalt arbeids- og næringsliv vil gjere undervisninga i emnet verkelegheitsnært.
Gjeldande læreplanar, fagteori og fagdidaktikk vil saman med studenten sin eigen skulepraksis, og rolla som utøvar, danne refleksjonsgrunnlag i studiet.
Tilbodet vil vektlegge å auke studenten sin profesjonsfaglege digitale kompetanse, ved bruk av ulike digitale læringsressursar og undervisningsformer, knytt til gjennomføring av studiet, og som verkty i det praktiske arbeidet.
I samsvar med det nasjonale kvalifikasjonsrammeverket har studenten følgjande læringsutbytte etter fullført emne:
Studenten
- har kunnskap om tradisjonelle og utforskande tilnærmingar til tre som material
- har kjennskap til trematerialar sine eigenskapar, og moglegheiter for visuelt uttrykk, også knytt til samisk kunsthandverk
- har kunnskap om val av høveleg teknikkar og verkty til konkrete oppgåveløysingar
- har kunnskap om enkle og tenelege digitale verkty, til bruk i stegvise og skapande prosessar
- har kjennskap til oppbygging av ein enkel treverkstad, samt kunnskap om stell og vedlikehald av handverkty og maskiner
- har kunnskap om planlegging, gjennomføring og vurdering knytt til undervisning i tre
Studenten
- kan legge til rette for og leie eleven sitt arbeid med tradisjonelle, samt utforskande tilnærmingar i tre
- kan utforske trematerialar sine eigenskapar, funksjonelt og visuelt
- kan rettleie eleven i val av høveleg teknikk og verkty knytt til konkrete oppgåveløysingar
- kan støtte eleven i arbeidet med idéutvikling og skissearbeid ved hjelp av digitale verkty
- kan organisere ein treverkstad for undervisning, samt enkel vedlikehald av handverkty og maskiner
Studenten
- kan utnytte faget sitt potensiale til å fremje gjenbruk og berekraftig utvikling
- kan reflektere over relevante HMS-tiltak knytt til fagområdet
- kan bruke verdiar i faget til å stimulere elevane si personlegdomsutvikling og danning
- har kunnskap om og kan formidle visuell og materiell kultur som grunnlag for kulturforståing
Emnet er nett- og samlingsbasert med to samlingar på Høgskulen i Volda. I tillegg vert det lagt opp til digitale læringsløyper og nettbasert veiledning i mellom samlingane.
Samlingane vil sikre at studentane får nødvendig undervisning og rettleiing i praktisk arbeid i verkstadane, erfaring i bruk av handverkty og maskiner, samt kunnskap om varierte arbeidsmåtar og -prosessar, som står sentralt i arbeidet med treundervisning. Mellom kvar samling må studenten pårekne arbeid i treverkstad ved eigen arbeidsplass.
Arbeids- og undervisningsformene i studiet vil veksle mellom praktisk og teoretisk tilnærming og oppgåveløysing, og didaktisk refleksjon knytta til studenten si eiga praksiserfaring. Aktiv bruk av digitale verkty og læringsressursar vert vektlagt.
Frammøtekrav:
Det er obligatorisk frammøte og deltaking i alle organiserte læringsaktivitetar og undervisning, jamfør Forskrift om opptak, studium og eksamen, §4-6 (https://lovdata.no/dokument/SF/forskrift/2014-12-04-1697).
Arbeidskrav:
80 % gjenomføring av alle læringsløyper i semesteret. Kvar læringsløype inneheld oppgåver som studentane skal gjennomføre innan fastsett frist. Kunnskapsdeling på eigen arbeidsplass, og undervegsvurdering blir særleg tematisert.
Sensur vert gjennomført i samsvar med Forskrift om opptak, studium og eksamen ved Høgskulen i Volda, § 9-4.
Studentane betaler ei materialavgift på kr. 400,- til innkjøp av fellesmaterialar. I tillegg må kvar student pårekne kjøp av litt reiskap/utstyr, samt materialar til eige eksamensarbeid.
- Kunst og handverk 1, 1.-10. trinn - Kompetanse for kvalitet
| Vurderingsform | Gruppering | Varighet | Karakterskala | Andel | Kommentar | Hjelpemidler | Omfang |
|---|---|---|---|---|---|---|---|
Mappeeksamen | Individuell | Semester | Stått eller ikkje stått | Ei mappe med praktiske arbeid og fagdidaktisk refleksjon. |