På bakgrunn av fagstudium i framandspråk skal fagdidaktikkemnet i framandspråk gi studentane eit grunnlag for å sjå språk som mennesket sitt viktigaste kommunikasjonsmiddel og som ein reiskap for å utvikle tanke og personlegdom. Noreg er eit lite språksamfunn, og nordmenn nyttar seg av framandspråk for å få kunnskap om – og innsikt i – andre land sine kulturar og for å kunne vere ein del av verdssamfunnet. Både innafor utdanning, yrkesliv og den private sfære gjer samarbeid på tvers av landegrenser og kulturar det viktig å lære framandspråk.Gjennom fagdidaktikkstudiet i framandspråk skal studentane få medvit om framandspråk som ferdigheitsfag, reiskapsfag, kultur- og danningsfag. Elevane sin totale språkkompetanse er ei felles oppgåve for alle språkfaga. Undervisninga skal gjere det mogleg for studentane å tileigne seg kunnskap, gjere praktiske erfaringar og utvikle evne til refleksjon, i møte med fagdidaktiske problemstillingar som relaterer seg til framandspråk i skule og opplæring.

Utdanninga skal også kvalifisere til å ivareta opplæring om samiske forhold. Under dette kjem kjennskap til den statusen urfolk har internasjonalt, og samiske born og ungdommar sin rett til opplæring i tråd med opplæringslova og gjeldande læreplanverk.