Volda-alumnar med dokumentarfilm om Merkesteinane

Utgangspunktet for ”It’s hard to be a rock’n’roller” er ein eksamensfilm Gunhild Asting laga om Merkesteinane med tittelen ”Men drømmen er gratis”. Med dei kjende produsentane Margreth Olin (”Dei mjuke hendene”, ”Ungdommens råskap” m. fl.) og Thomas Robsam på laget, har historia om Merkesteinane utvikla seg til Asting sin første langfilm. ”It’s hard to be a rock’n’roller” skal visast for filmbransjen under filmfestvalen i Haugesund no på tysdag.

Gunhild Asting og Margreth Olin under ein dokumentarfilmfestival i Volda

Førpremiere og plateslepp

Før filmen går ut til kinoar over heile landet 1. september, skal filmen visast for publikum i heimkommunane til medlemmane i Merkesteinane. I Volda vert det stor fest fredag den 25. august på Volda filmteater med m.a. regissør Gunhild Asting, Kai Zahl (landsforbundet til Dissimilis) og Volda komunestyre. Billettar kan kjøpast på filmteateret torsdag 24. august mellom kl. 18.30 og 21.00 og før framsyninga på fredag 25.  Etter filmen vert det plateslepp. Merkesteinane er nemleg ute med sin andre CD ”Greitt nåkk”.

Pedagoisk leiar Jostein Bjørndal, kinosjef Oddbjørn Røys og dagleg leiar Øyvind Lied gler seg til førpremiere i Volda 25. august.

Høgskulen i Volda, ”Den kulturelle skulesekken” og Afrika

Langfilmen om Merkesteinane skal også visast for ungdomsskular i Møre og Romsdal gjennom ”Den kulturelle skulesekken”, eit kulturprogram for elevar i grunnskulen som Høgskulen i Volda er svært delaktig i. I tillegg samarbeider Høgskulen i Volda og Merkesteinane om eit prosjekt i Matare-slummen i Nairobi. Målet for dette prosjektet er m. a . å betre tilhøva for psykisk utviklingshemma gjennom bruk av musikk som verkty.