Volda-student blir heiltidspolitikar
På landsmøtet til Studentenes Landsforbund (StL) i helga vart Olav Øye frå Høgskulen i Volda valt til ny internasjonalt ansvarleg i StLs styre. Han flyttar til Oslo og byrjar i fulltidsvervet 1. juli.
- Internasjonalt ansvarleg i StL er det mest spennande og sexy vervet ein kan ha i norsk studentpolitikk, seier 23-åringen.
Valspråket til trønderen var ”Verda for nordmenn og Norge for utlendingar”.
- Noreg er eit lite land i Europa og verda, og vi må heile tida søke impulsar utanfrå. Utdanningsinstitusjonane våre bør sende ut og hente inn fleire studenter på utveksling enn dei gjer i dag, seier Øye.
23-åringen har tidlegare site i styret for Studenttinget i Volda (STiV) og Studentsamskipnaden for Sunnmøre.
Leiar Øyvind Bakke i StL studerte historie ved Høgskulen i Volda før han vart sjef for organisasjonen for snart eitt år sidan.
- Svært mange Volda-studenter har markert seg i StL i løpet av organisasjonens ti-årige historie, seier Bakke.
StL representerer rundt 100 000 studentar ved omlag 30 høgskular og andre offentlege utdanningsinstitusjonar, og kjempar for studentane sine økonomiske, faglege, sosiale og demokratiske interesser.