Hovudtema for dei tre første studieåra (syklus 1) er lærarrolla, lærararbeidet, elevmangfaldet, skulen som organisasjon  og læraren si tilrettelegging for læring av fag for 1. til 7. trinn. Praksis i andre studieår er delt inn i to sjølvstendige emne med avsluttande vurdering i begge. Praksis 2A har hovudfokus på elevrolla, elevmangfaldet  og begynnaropplæring.

I andre studieår har studentane eit meir sjølvstendig ansvar for å planlegge, gjennomføre og vurdere undervisning. Studentane skal observere elevar sine føresetnader og utvikling i begynnaropplæringa, og observere gruppeprosessar og relasjonar mellom elevane. Dei skal også observere og rettleie medstudentar som underviser.

Praksistudiet har ein integrerande funksjon i grunnskulelærarutdanninga og føreset samarbeid mellom studentar, faglærarar, praksislærarar og skuleleiing. Studentane skal ha praksis i dei undervisningsfaga som er valt i studieprogrammet. Faglærarar, praksislærarar og studentar samarbeider tett i planlegging, gjennomføring og etterarbeid i praksis. 

I dette studieåret legg ein stor vekt på begynneropplæring og korleis ein kan arbeide med faga i undervisninga. Studentane skal systematisk få prøve ut ulike og sentrale arbeidsformer, og få erfaringar med korleis dei fungerer for ulike elevar og i forskjellige fag. Eit viktig poeng i praksisen dette året er omsynet til det faglege innhaldet i studentane si undervisning. Det blir lagt stor vekt på det faglege nivået i timane, på korrekt og inspirerande fagleg formidling og tilbakemelding til elevane. Studentane skal få erfaring med korleis førebu, gjennomføre og avslutte undervisningssekvensar for at elevane skal ha fått gode faglege opplevingar og erfaringar. Tilhøvet mellom faginnhald og arbeidsformer er sentralt, like eins er måten det faglege innhaldet blir arbeidd med viktig.