Målet med emnet er å gi ei grundig innføring i den tekniske og sosiale historia til skrifta frå opphavet til den seinaste tida. Emnet gir også ei innføring i dei sosiale følgjene som skrifta har fått i sine ulike utformingar. Vi ser på korleis skriftleggjering av sentrale samfunnsfunksjonar heng saman med modernisering, samtidig som det viser seg at den europeiske vegen til skriftkulturell modernisering berre er éin av fleire eksisterande vegar dit. Emnet tek opp særleg kva høve skrifta gir for maktutøving, og korleis innføringa av skrift skapte nye sosiale klasser. Særleg den moderne nasjonen var eit produkt av skriftleggjorde talespråk. Den siste delen av emnet handlar om korleis nynorsken frå Aasen og framover har vore eit ekstremt døme på talespråkleg legitimering av eit skriftmål, samtidig som han i motsetning til bokmålet har følgt eit heller vanleg europeisk mønster for skriftfesting av eit talemål. Saman med emnet Vitskapsteori og metode (NYN302) gir dette emnet eit godt grunnlag til å ta valemna i mastergraden i nynorsk skriftkultur, og til å begynne på masteroppgåva.