I dette emnet tek vi for oss eit utval nynorsk fiksjonslitteratur og sakprosa frå dei siste tiåra – med forholdet mellom tekst, historie og skriftkultur som overordna perspektiv. SKR304 byggjer såleis vidare på kunnskapar frå dei obligatoriske innføringsemna. 

Ei tradisjonell førestilling om «nynorsk» er at litteraturen som er skriven på dette språket, er vendt mot fortid og bygdeliv, i motsetning til det notidige og urbane. Tekstane vi arbeider med i dette emnet, er henta frå vår eiga tid, samstundes som alle har  eit blikk på fortida. Men kva slags blikk er det, og korleis kjem det til uttrykk, formelt og tematisk? Korleis koplar nynorsk samtidslitteratur  mellom notid og fortid, og kva slags forståing av ‘historie’ kjem til uttrykk i denne koplinga? I kva grad ser den nynorske samtidslitteraturen seg sjølv som del av ein motkultur eller ein spesifikt nynorsk litterær tradisjon? Spørsmåla om historisitet og om samtidas nynorske, litterære skriftkultur grip såleis over i kvarandre og vil stå sentralt i arbeidet med pensumtekstane.