Emnet vektlegg kompetanse i å legge til rette for eit inkluderande læringsmiljø i barnehagen gjennom tilpassing og meistring for barn med ulike føresetnadar for læring. Studiet legg vekt på dialog, samhandling og kritisk refleksjon knytt til ulike tema, slik at studentane får eit godt grunnlag til refleksjon rundt problemstillingar dei møter i eige pedagogisk arbeid.

Utdanninga retter seg mot tilsette i barnehage som har relevant bachelorutdanning og som ønsker å utvikle eigen kompetanse i emnet. Studiet inneheld ulike teoretiske innfallsvinklar til det spesialpedagogiske området og vert kjenneteikna av ei breiddetilnærming til inkludering og tidleg innsats, med mål om at studentane utviklar evne til kritisk og analytisk tenking og handlingskompetanse. Sentralt i studiet er kunnskap om å legge til rette for eit allmennpedagogisk tilbod av høg kvalitet for barn som treng spesialpedagogisk hjelp og ekstra støtte, til dømes kunnskap om omsorgssvikt og korleis barnehagen kan arbeide forebyggande med dette. 

Emnet tek også føre seg korleis leiing og åtferd påverkar læringsmiljøet og det psykososiale miljøet i barnehagen. Tematikken blir sett på ut frå både eit individ- og systemperspektiv. Vaksenrolla, leiing og mobbing er sentrale område i denne samanhengen. Vi legg vekt på ei heilskapleg forståing av åtferdsvanskar, og går inn i ulike tilnærmingar for å forklare konsekvensane av ulike tiltak som vert iverksett av barnehagen, både inn mot barnegruppa og mot barnehagen som organisasjon. Vi har søkelys på tidleg innsats og inkludering, knytt både til tidleg barndom og til ei forståing der innsatsen vert sett i verk tidleg ved avdekking av behov for ei tettare oppfølging - uavhengig av alder på barnet. Inkludering er eit gjennomgåande prinsipp i dei ulike tematikkane i emnet. Studiet vil også gi kompetanse på språkleg utvikling, språkvanskar og betydinga av språkleg kompetanse.

Kunnskap om samarbeid med heimen og tverrprofesjonelt arbeid med barn som treng ekstra støtte, kommunikasjon og relasjonelt arbeid, samt observasjon, kartlegging, dokumentasjon og vurdering inngår i studiet. Studiet omhandlar også kunnskap om korleis digitale verktøy kan vere ein ressurs i det pedagogiske arbeidet når det gjeld tilrettelegging for barn sin leik, læring og utvikling.

Studentane skal få erfaringar med å vurdere og analysere det dei lærer i studiet i tråd med innhaldet i Rammeplan for barnehagen. Med utgangspunkt i rammeplanen sitt verdigrunnlag vil tema som barn og barndom, demokrati, mangfald og respekt, likestilling og likeverd, berekraftig utvikling, og livsmeistring og helse, inngå i studiet på eit overordna og tverrprofesjonelt nivå.