Studiet DKL111N Profesjonsfagleg digital kompetanse og læringsnettverk har eit særleg fokus på utvikling av din eigen profesjonsfaglege digitale kompetanse og læringsnettverket du treng for å halde deg oppdatert. Studiet er lagt opp med tett fagleg oppfølging, diskusjonar og moglegheit for samarbeid eller individuelt arbeid etter eige ønske. Fleire mindre arbeidskrav byggjer til saman mappeoppgåvene du skal levere, og du får tilbakemelding og innspel gjennom heile studiet.

Rammeverket for profesjonsfagleg digital kompetanse er utgangspunkt for studiet, som tek deg gjennom heile rammeverket med både praktiske og teoretiske inngangar. Fagfornyinga og krav til læraren i framtidas klasserom står også sentralt. Internett har bidrege til at alle kan samarbeide, kommunisere, produsere, publisere, dele og delta i samfunnsdebatten. Det er viktig med kompetanse i å finne fram, sile ut, skape og bruke innhald i ulike ressursnettverk, men også å ta bruk kompetansen barn og unge kan bidra med i læringsarbeidet. Digital dømmekraft i høve til nettjuss, nettvett, digital mobbing og sosiale medier er sentrale tema. Det same er digital didaktikk, korleis vurdere ulike ressursar og verktøy for læring. Emnet har både praktiske og teoretiske tilnærmingar, og ein får utvikla seg fagleg både profesjonelt og personleg gjennom å tileigne seg nye læringsmetodar for livslang læring.