Studiet DKL114N har eit særleg fokus på samansette tekstar og medieproduksjon for læring, med både teoretiske og praktiske innfallsvinklar og fagleg oppfølging undervegs. Bruk av multimodale/samansette tekstar i læringsarbeidet krev multimodal tekstkompetanse. Det krev kunnskap om blant anna skrift, bilete, lyd og video, og korleis ulike meiningsberande ressursar kan produserast og setjast saman til eit meiningsfullt innhald. Bruk av digital teknologi i eit læringsmiljø krev kjennskap til ulike digitale ressursar som programvare, nettressursar og digitale einingar, i tillegg til kunnskap om barn og unge sin mediebruk og mediekultur. Den utbreidde bruken av Internett og digitale ressursar har bidrege til at skrifta ikkje har ein like dominerande posisjon som tidlegare. Konsum og produksjon av samansette tekstar har vorte ein del av barne- og ungdomskulturen. Alle kan i dag samarbeide, kommunisere, produsere, publisere, dele og delta i mediekulturen ved hjelp av enkelt tilgjengeleg teknologi. Didaktisk arbeid med samansette tekstar og digitale ressursar utgjer ein naturleg del av læringsprosessane i dag. Bruk av digitale ressursar, produksjon og vurdering av medieprodukt, samt fokus på eleven sitt læringsutbytte og utvikling av digital kompetanse er sentralt i studiet. Studentane vil arbeide med å vidareutvikle sin profesjonsfaglige digitale kompetanse ved å tilegne seg kunnskap, reflektere, produsere og vurdere medieproduksjon og samansette tekstar gjennom diskusjonsforum og faglege tilbakemeldingar.