Emnet kan vere del av Religion, livssyn og etikk 2x15 og 4x15 stp. nettstudium. Emnet gjev kunnskap om kristen tru og tradisjon. Det presenterer historia åt kristendomen gjennom to tusenår. Emnet tek særleg føre seg reformasjonstida og det konfesjonelle mangfaldet i hundreåra etter. Det gjev kunnskap om kristen truslære i eit økumenisk perspektiv, og studenten skal få grunnlag til å vurdere både prinsipielle og aktuelle spørsmål omkring kristen etikk.

Emnet kombinerer studium av kristendomshistoria med systematisk teologi. Dei to første delemna er historiske - med vekt på korleis tru og praksis har arta seg i skiftande kontekstar gjennom tidene. Dei to neste tek føre seg dogmatikk og etikk.

Del 1: Frå urkyrkje til reformasjonstid (3 p) 
Delemnet framstiller kyrkja si utvikling frå forfølgd minoritet til folkekyrkje med politisk makt. Det vert lagt vekt på oldkyrkja og mellomalderkyrkja si misjonerande verksemd, og studiet vert ført fram til reformasjonen i Danmark-Noreg.

Del 2: Kyrkjeleg mangfald (4 p) 
Delemnet tek utgangspunkt i den lutherske, kalvinske og engelske reformasjonen og gjev innføring i det protestantiske mangfaldet i nytida. Det vert lagt vekt på kyrkja og teologien sitt møte med nye vitskapar, sekularisering og demokratisering. Dette inkluderer ei framstilling av utviklinga frå reformasjonen til vår eiga tid i Noreg.

Del 3: Kristen tru (5 p) 
Delemnet gjev innføring i truslære etter luthersk tradisjon. Dette vert relatert til økumeniske perspektiv med vekt på den nikenske truvedkjenninga.

Del 4: Kristen etikk (3 p) 
Delemnet gjev ei kristen grunngjeving av etikken, og drøftar utvalde tema som: Etikk og kristen tru; kristen etikk og anna etikk; menneskesyn og menneskeverd, familie og samliv, mennesket som forvaltar, arbeid og yrke, økonomi, naturen og politikk.