Dette emnet kombinerer studium av kristendommens historie med systematisk teologi. I dei to første delemna er perspektivet historisk, med vekt på arbeid med å formulere kristen tru og vedkjenning i skiftande kontekstar, frå urkyrkja til reformasjontida. I dei to neste er det kristen truslære og kristen etikk som er i fokus.

Delemne 1: Frå urkyrkje til reformasjonstid (3 p) 
 Delemnet framstiller kyrkja si utvikling frå å vere religiøs minoritet under fiendsleg statsmakt, til folkekyrkje med politisk makt. Det blir lagt vekt på oldkyrkja og mellomalderkyrkja si misjonerande verksemd fram til kristninga av Noreg. Studiet vert ført fram til reformasjonen i Danmark-Noreg.

Delemne 2: Kyrkjeleg mangfald (4 p) 
 Delemnet tek utgangspunkt i den lutherske, kalvinske og engelske reformasjonen og skal gje ei innføring i det protestantiske mangfaldet i nytida. Det vert lagt vekt på kyrkja og teologien sitt møte med nye vitskapar, sekularisering og demokratisering. Delemnet vil vidare gje ei framstilling av utviklinga frå reformasjonen til nyare tid i Noreg.

Delemne 3: Kristen tru (6 p) 
 Dette delemnet gjev innføring i truslære i ein luthersk læretradisjon. Ved sida av kjem ei truslære i økumenisk form som ei utlegging av den nikenske truvedkjenninga.

Delemne 4: Kristen etikk (2 p) 
 Delemnet gir ei kristen grunngiving av etikken, og drøftar nokre utvalde etiske tema. Det blir lagt vekt på følgjande delemne: Etikk og kristen tru; kristen etikk og anna etikk; menneskesyn og menneskeverd, familie og samliv; mennesket som forvaltar; arbeid og yrke; økonomi; naturen; politikk.