Emnet gir ei innføring i samfunnsfagdidaktikk og samfunnsvitskapleg teori og metode, og i samfunnsfaget som skulefag. Emnet gir også ei tverrfagleg innføring i sentrale tema i faget. Skulen si rolle i samfunnet og korleis skulen kan legge til rette for utøving av demokrati og medborgarskap er sentrale tema i emnet. Historia om menneskerettane og menneskerettane som undervisningstema er andre viktige tema. Historiske og notidige eksempel på inkludering og ekskludering av urfolk og minoritetar i den norske offentlegheita er også sentralt. Emnet har eit særleg fokus på at studentane skal styrke evna si til å tenke kritisk. Det blir lagt vekt på at studentane skal utvikle kompetanse i kjeldekritikk, bruk av nyhendebilde som ressurs i undervisninga, og å finne fram til relevante kjelder. Studentane skal utvikle evna til å bruke fagomgrep i faglege diskusjonar og i eigen praksis. I arbeidet med dei ulike tematikkane vil studentane opparbeide seg kjennskap til teoretiske og didaktiske perspektiv, som skal bidra til å styrke eigen undervisningspraksis.