Deltid: Førskulelærarutdanning i M&R og i NF

Førskulelærarutdanning i Møre og Romsdal og i Nordfjord
Eit internett- og deltids-organisert studium over 4 år

Høgskulen i Volda har tidlegare sett i gang 4-årig deltidsstudium i Kristiansund og Volda, ved sida av årlege oppstart av 3-årig heiltidsstudium i Volda.

No tilbyr vi førskulelærarutdanning som deltidsstudium med samlingar lagde til andre stader i fylket. Lokaliseringa av samlingane vert endeleg fastsett ved opptaket hausten 2003. (Pga av undervisning i spesialrom vil nokre av samlingane bli lagde til høgskulen sine lokale i Volda). I dette profesjonsstudiet kan studentane arbeide på heimstaden, individuelt og i basisgrupper, med web-tilknyting via Internett til faglege rettleiarar ved høgskulen.

Høgskulen oppmodar alle potensielle søkjarar å gjere seg kjende med brevet - og nyttar dette spesielle høvet til søkje om opptak, evt. i nært samråd med leiinga for institusjonen (barnehageeigar/ kommunen).

Kompetanse og yrkesliv
Førskulelærarutdanninga kvalifiserer for pedagogisk arbeid med barn i barnehage, for arbeid i 1. klasse i grunnskulen og for pedagogisk arbeid med barn på tilsvarande utviklingstrinn i andre institusjonar. Utdanninga gir ei brei høgskuleutdanning med pedagogikk som kjernefag og gir grunnlag for arbeid i mange andre yrke.




Målgruppe
Deltidsstudiet er retta mot studentar i regionen som under studietida har arbeid/oppgåver i barnehage eller anna pedagogisk verksemd, og som av praktiske grunnar kan ha vanskar med å gjennomføre ei ordinær 3-årig førskulelærarutdanning på heiltid.

Kunngjering av studietilbodet
Studietilbodet er kunngjort i Studiekatalogen 2003 - 2004, Høgskulen i Volda, og i «Søkerhandboka» 2003, Samordna opptak. Sidan høgskulen trur at interesserte søkjarar alt arbeider i barnehagen og skulen (utan formell utdanning), går høgskulen direkte ut til barnehagane og skulane i regionen og orienterer om tilbodet.

Innhald
Førskulelærarutdanninga som heiltidstudium er eit 3-årig bachelorprogram på 180 studiepoeng. Studiet omfattar følgjande emne; pedagogisk teori og praksis (45 studiepoeng), fagleg-pedagogiske studie i fag og fagområde (105 studiepoeng) og fordjupingseining ( 30 studiepoeng). Dei fagleg-pedagogiske studia er fysisk fostring, naturfag med miljølære, forming, norsk, drama, religion/etikk, samfunnsfag, musikk og matematikk.

Førskulelærarutdanning som deltidsstudium tilsvarer den 3-årige utdanninga, men studiet er lagt over fire år. Pedagogisk teori og praksis vil gå over alle dei fire åra, medan dei fagleg-pedagogiske studia vert avslutta etter tre år. Dei tre første åra vil innehalde pedagogisk teori og praksis og tre fagleg-pedagogiske studium. Fjerde og siste studieåret vil innehalde pedagogikk og fordjuping.

Organisering og arbeidsformer
Fellesundervisninga vert organisert som konsentrerte samlingar på ei veke og det vil bli om lag ei studiesamling pr. månad, i alt 10 vekesamlingar per studieår. Vekesamlinga kan variere mellom fellessamling og seminar. Ei samling er til vanleg fem dagar, måndag til fredag. Opplæringa kan leggast mellom kl. 0800 og kl. 1800 måndag til torsdag, fredag kl. 0800 og kl. 1600. Både praksisperiodane, arbeidet i basisgrupper og avsluttande eksamenar kjem i tillegg til samlingane.



Studentane vert organisert i basisgrupper på 4-6 frå ulike delar av regionen, i størst mogleg grad lokalisert til same nærmiljø. Mellom samlingane vert det føresett at studentane arbeider på eiga hand med faga, i basisgruppene eller løyser pålagte oppgåver med nett-/webtilknyting (Classfronter/-Internett) rettleia av faglærarar tilsette ved Høgskulen i Volda. Sidan det vert gitt opplæring i data, er det ikkje krav om førekunnskap.

Praksis i førskulelærarutdanning på deltid
I 1. studieåret skal studentane gjennomføre to veker observasjonspraksis på eigen arbeidsstad. (Det er viktig at studentane vert frigjort frå anna arbeid slik at dei kan gjennomføre og få godkjent arbeidskrava knytt til observasjonspraksis). I 2. og 3. studieåret skal det vere fem veker rettleidd barnehagepraksis i annan barnehage. I 3. studieåret skal studentane også ha ei veke grunnskulepraksis, og i 4. studieåret er det to veker fagpraksis i samband med fordjuping.

I deltidsstudiet utgjer rettleidd barnehagepraksis 10 veker og observasjonspraksis utan rettleiar to veker. Til samanlikning har heiltidsstudiet 16 veker rettleidd barnehagepraksis. I rettleidd barnehagepraksis får studenten rettleiing og vurdering av førskulelærar tilsett i barnehagen med funksjon som øvingslærar.

Krav om arbeid i barnehage/pedagogisk arbeid i løpet av studietida
Føresetnaden for den reduserte praksisopplæringa - og elles noko redusert undervisning i studiet i høve heiltidsstudiet - er at studenten parallelt i deltidsstudiet har minst 20% pedagogiske arbeid i barnehage eller i annan pedagogisk institusjon (minimum ein dag pr. veke i gjennomsnitt). Studenten må sjølv sikre seg slik praksis og stadfeste det ved studiestart.

Arbeidstilhøve som kan godkjennast som pedagogisk arbeid kan vere tilsetjing (med løn) t.d. som assistent, vikar m.m. i skule, barnehage eller annan pedagogisk institusjon. Studentar kan ha uløna praksis når ein ikkje er tilsett. Vi presiserer at det ikkje er noko krav om av studentar må ha eit løna tilsetjingsforhold i studietida. Høgskulen vil berre krevje dokumentasjon på at studenten kontinuerleg er i ein pedagogisk arbeidssituasjon på minimum 20% av eit årsverk, at dette sikrar kjennskap til praktisk-pedagogisk arbeid og at det utfordrar studenten til gjere pedagogiske erfaringar undervegs. Høgskulen rår til at studenten parallelt ikkje har meir enn 50% løna arbeid for å få best mogleg utbytte av studiet.

Tilleggsinformasjon

Opptakskrav
Opptak til deltidsstudiet skjer på grunnlag av generell studiekompetanse eller etter individuell vurdering basert på realkompetanse, dvs tidlegare utdanning og praksis/erfaring. Opptaket er avgrensa til 50 studentar.

Opptaket
Samordna opptak:
Søknadsfrist 15. april 2003

For meir informasjon sjå Studiekatalog 2003-2004, Høgskulen i Volda, www.hivolda.no og «Søkerhandboka» 2003
www.samordnaopptak.no

Planlagd oppstart
Studiestart vert august/september 2003 med avslutning juni 2007.

Nærare informasjon om undervisningssamlingar, fag og organisering vert gitt seinare.

Atterhald
Høgskulen tek atterhald om endring i studietilbodet i samband med ny Rammeplan for førskulelærarutdanning frå hausten 2003.

Bachelorgrad (BA)
Fullført førskulelærarutdanning gir graden Bachelor (BA)

Bachelorgrad og 1 år vidareutdanning (adjunkt)
Fullført førskulelærarutdanning kan m.a. byggjast på med 1. års vidareutdanning i Pedagogisk arbeid på småskulesteget (PAPS). Dette gir kompetanse for tilsetjing 1.- 4. klasse i grunnskulen.

Bachelor- og mastergrad (lektor)
Fullført førskulelærarutdanning kan byggjast vidare til mastergrad. Tilbod om 2 -årige masterprogram er under utarbeiding ved Høgskulen i Volda, avdeling for lærarutdanning, td master i spesialpedagogikk/tilpassa opplæring.

Kontakt
Studieleiar/fagleg ansvarleg for førskulelærarutdanninga: Høgskulelektor Britt Loven Ølnes, T: 70 07 53 71

Praksisansvarleg: Førstekonsulent Randi N.Slinning, T: 70 07 53 14

Opptaksansvarleg v/HVO: Førstekonsulent Torill Engeset,
T: 70 07 51 12

Last ned pdf-brosjyre:
http://www.hivolda.no/melding/fu-deltid03.pdf