Døssland og Løseth sentrale i storverket ”Norges fiskeri- og kysthistorie”

Historieverket har i alt fem band, og blei offisielt lagt fram for Dronning Sonja i Trondheim tysdag 19. august. 

Verket har vorte leia frå Universitetet i Bergen, i samarbeid med forskingsinstitusjonane Høgskulen i Volda, Universitetet i Nordland og Universitetet i Tromsø.

Døssland (bindredaktør) og Løseth har arbeidd med 2. bandet i verket, og det handlar om tida 1720-1880 og har tittelen «Ekspansjon i eksportfiskeria, 1720-1880». Nils Kolle ved Universitetet i Bergen har vore fagleg prosjektleiar, medan Leiv Grønnevet har vore styreleiar for heile prosjektet. Den tidlegare voldastudenten Andreas Nybø har som forlagsredaktør vore sentral i utgjevinga av boka. Stipendiat Trudi Henrydotter Eikrem ved Høgskulen i Volda arbeider som stipendiat med tilknytning til prosjektet, i lag med tre andre stipendiatar ved dei andre samarbeidande institusjonane.

Dette er eitt av dei største historie- og humanistiske forskingsprosjekt i Noreg dei siste åra. Den samla innsatsen i prosjektet er rundt 40 millionar kroner. Det største bidraget har kome frå Næringsdepartementet og Innovasjon Norge, men i sum har aktørar i bransjen som Noregs Fiskarlag, Fiskebåt og ei rekkje bedrifter og bankar vore med på spleiselaget for å få prosjektet i hamn. Leiv Grønnevet har her spela ei avgjerande rolle. Noregs Forskingsråd har ikkje delteke i finansieringa av prosjektet, noko sentrale aktørar i prosjektet ikkje nekta for at dei hadde vore skuffa over undervegs i prosjektet. Arbeidet blir runda av i 2015  med eit engelsk samandrag av dei fem banda på norsk.

Bakgrunnen for at voldaforskarane kom med i prosjektet er dei tidlegare arbeida som har vorte – og blir – utført ved Historisk institutt og samarbeidspartar: Fylkeshistorie for Møre og Romsdal (1990-1996), og Strilesoga (1996-2001). Men ikkje minst var historieverket «Havfiskeflåten i Møre og Romsdal og Trøndelag» (2006) som Atle Døssland, Arnljot Løseth (prosjektleiar), Oddbjørn Melle og Harald Tafjord (bilderedaktør) deltok på, også med Leiv Grønnevet som sentral på finansieringssida. Med i dette bildet høyrer også samarbeidet med blant andre Høgskulen i Sogn og Fjordane om Fylkeshistorie for Sogn og Fjordane som er planlagt utgitt i 2015.

Dronning Sonja opna fiskerimessa og fekk bokverket i gåve. Her trår ho til og hjelper NRK med lyden då fiskeriminister Elisabeth Aspaker heldt tale i høve bokgåva. Til høgre Leiv Grønnevet.

Fylkesordførar Jon Aasen var til stade på fiskerimessa og gratulerte forfattarane med verket. Han håper bøkene blir å finne på alle skular og bibliotek i fylket.

Alle bindredaktørane samla. Frå venstre Edgar Hovland (Universitetet i Bergen), Pål Christensen (Universitet i Tromsø), Nils Kolle (Universitetet i Bergen), Atle Døssland (Høgskulen i Volda) og Alf Ragnar Nielssen (Universitetet i Nordland).  

Prosjektet sine nettsider:
http://norges-fiskeri-og-kysthistorie.b.uib.no/

Tekst og foto: Johann Roppen.