Forskingsrådet løyver seks millionar til forskingsprosjekt

- Denne løyvinga er utan tvil ei fin fjør i hatten for historiemiljøet og den nye mastergraden i kulturmøte her ved Høgskulen i Volda. Ved høgskulen finst det eit solid miljø for forsking på lokalt og regionalt nivå. Dette gjeld ikkje minst innanfor samfunnsfaga og historie, seier professor Døssland.

Professor Atle Døssland.

Prosjektet, som ein no har fått løyving til, fokuserer på ei etablert førestilling om at det i perioden ca. 1670 – 1870 fanst ei enkel kulturell todeling i det norske samfunnet – ein elitekultur der embetsmannsgruppa dominerte, og ein folkekultur dominert av bondegruppa.

- Vi set spørsmålsteikn ved eit slikt essensialistisk syn eller vil i det minste nyansere denne todelinga. For det første var både elitesjiktet og bondesjiktet langt meir mangfaldig enn denne tokulturlæra tilseier. Dei var også gjennomskorne av vertikale band, såkalla patron-klient-band. For det andre er vår hypotese at det fanst vesentlege regionale kulturskilnader, og dermed også skilnader i korleis kulturmøta arta seg. Prosjektet vil difor ha eit regionalt fokus. Teoriar og typologiar kring disiplinering, samfunnsorganisering og, ikkje minst, patron-klientrelasjonar vil vere nyttige reiskapar under tilnærminga, seier Døssland.

Delprosjekt
Prosjektet vil bli gjennomført som tre integrerte delprosjekt:

1. Embetmenns og bønders orienteringsverd, eigenoppfatning og kulturelle særtrekk – ein regional komparasjon. Delprosjektleiar: Knut Sprauten, Norsk lokalhistorisk institutt

2. Embetsmennene sine sosiale og økonomiske relasjonar i høve till bondesamfunnet. Delprosjektleiar: Arnfinn Kjelland, Historisk institutt

3. Maktbasis, maktutøving og regionale tilpassingar. Delprosjektleiarar: Birger Løvlie, Institutt for religion, livssyn og kristendom og Brynjulv Gjerdåker, Historisk institutt

Prosjektmedarbeidarar er ei gruppe fast tilsette ved Historisk institutt og Institutt for religion, livssyn og kristendom (RKL). I tillegg vil ein ha eit formalisert samarbeid med Norsk lokalhistorisk institutt.

- Forskinga vil likevel i størst omfang skje gjennom to utlyste doktorgradsstipend og eitt post. doc.-stipend. Det vert lagt opp til å kople masterstudentar ved masterprogrammet i kulturmøte på del- og underprosjekta frå hausten 2009. Prosjektet vil lyse ut stipend á kr 96000 pr oppgåve/studentårsverk. Det vert også ein nasjonal oppstartskonferanse hausten 2008 og ein internasjonal oppsummeringskonferanse i 2011, seier Døssland

Andre strategiske høgskuleprosjekt (SHP)
I fjor fekk HVO fem mill. til "Journalistikk i endring:  Ny teknologi, ny økonomi – nytt samfunnsoppdrag?".