Kåre Heggen tok imot FoU-prisen
Prisvinnar Kåre Heggen (t.v.) og rektor ved HVO, Johann Roppen.
Heggen fekk prisen under opninga av Forskingsdagane 2015 i biblioteket ved høgskulen fredag. Styret ved Høgskulen i Volda (HVO) har sidan 2006 delt ut FoU-prisen for å heidre framifrå forskings- og utviklingsarbeid, og det var dei som peikte ut Heggen, som er professor ved Avdeling for samfunnsfag og historie.
– STÅR I FRONTEN
Johann Roppen, rektor ved HVO, hadde æra av å gje Heggen diplomet som det synlege beviset på prisen. I tillegg fekk Heggen 30 000 kroner, som skal nyttast til vidare FoU-arbeid.
– I tildelinga la høgskulestyret vekt på at Kåre Heggen har ein betydeleg fagproduksjon innanfor feltet utdannings- og profesjonsforsking. Han har vore med i offentlege utval, han står i fronten når det gjeld kunnskap om forholdet mellom profesjon, kunnskap og utdanning, sa Roppen mellom anna i sin tale til prisvinnaren.
Det siste tiåret har Heggen vore viktig for å halde god kontakt med Senter for profesjonsstudier (SPS) ved Høgskolen i Oslo og Akershus. Det har spela ei stor rolle i arbeidet med faginnhaldet i masterutdanninga i helse- og sosialfag og som komponent i den nye PhD-utdanninga ved HVO.
– Kåre Heggen har også ein stor fagleg produksjon, både i lærebøker, fagtidsskrift og fagbøker. Heggen er også ein av pionerane ved Høgskulen i Volda. Han kom hit som nyutdanna og har spela ei viktig rolle for det sosialfaglege miljøet heilt frå 1970-talet, heldt Roppen fram.
VART ANBEFALT
Men det var langt ifrå opplagt at Heggen skulle kome til høgskulen og Volda tidleg på 70-talet. Sjølv om han er volding, var ikkje det i tankane hans på den tida.
– Eg var hovudfagsstudent på Universitetet i Oslo då. Så hadde eg ein forelesar som heitte Edvard Befring, og han skulle halde eit foredrag på Høgskulen i Volda. Då vart han spurd om han hadde ein student som kunne leie eit lite forskingsprosjekt på høgskulen. Befring anbefalte meg, og dermed vart det til at eg enda opp her på høgskulen. Det er ofte tilfeldigheiter som styrer slike ting, fortel Heggen.
god tilrettelegging
Han har ikkje angra på at han enda opp på høgskulen i heimbygda. Heggen har forska mykje på ungdom og utdanning, og dei siste åra har det vorte mykje profesjonsretta forsking.
– Eg vil takke høgskulen for at det har vore og er lagt godt til rette for å drive med forskings- og utviklingsarbeid. På Institutt for sosialfag har eg hatt svært gode kollegaer som har vore viktige for meg, seier Heggen.
FoU-prisen er noko han set stor pris på.
– Det er ei ære å få den. Det er så mange andre flinke folk som like godt kunne ha fått den. Difor vil eg også takke høgskulestyret som valde meg, og den eller dei som nominerte meg. Det er kjekt at nokon legg merke til at ein reiser faglege spørsmål og prøver å finne svar på dei.
Sjå heile programmet for Forskingsdagane 2015.