Ny bok om supermakter og kald krig

Langt om lenge

– Det var godt å endeleg kome i mål med boka, fortel Melle. – Det har vore eit frykteleg langt svangerskap. Interessa for internasjonal politikk og spesielt den kalde krigen vart kveikt då eg held på med hovudfag på 70-talet. Tidleg på 90-talet heldt eg mine første forelesingar om emnet, og då byrja også manuset å ta form. Men det er klart at når ein arbeider med eit manus over så lang tid, må det gjerast mange endringar undervegs, og noko av stoffet vert også forelda.

Frå lokal- og regionalhistorie til globalhistorie

Om ein ser på listene over det Oddbjørn Melle har skrive dei siste 15 åra, er det lokale og regionale tema som er mest iaugefallande. For nokre år sidan var han ein av medforfattarane av historieverket "Havfiskeflåten i Møre og Romsdal og Trøndelag".

Der mange bøker om den kalde krigen er meir eller mindre eindimensjonale, opererer denne boka på fleire analyse- og aktørnivå i sentrum og periferi av verdssystemet. Forståingsramma er vid i tid og rom, med kapitalismens ekspansjon og globale konsolidering som den store konteksten.

Det er lagt vekt på forholdet mellom supermaktene og på dei arenaene for den kalde krigen der USA gjorde seg sterkast gjeldande. Analysen kombinerer teori, empiri og historiografi. Viktige motkrefter til det vestlege hegemoniet var kommunisme, nasjonalisme og islamisme. Omgrep som globalisering og modernitet inngår i analysen saman med geopolitikk og ideologiar. Kulturdimensjonen er også med.