Prisvinnar i humanistisk tradisjon

Schultes fagfelt er nordisk språkvitskap med vekt på norrønt og vestnordiske språk og kultur. Han har ein svært omfattande fagleg produksjon med ei rad artiklar på høgt internasjonalt nivå. Han er ein aktiv og engasjert forskar som er sentral i oppbygginga av eit miljø kring språkhistorie, skriftkultur og literacy-forsking både i Noreg og Skandinavia.

Dekan ved avdelinga, Rakel Christina Granaas, la i sin introduksjon av prisvinnaren særleg vekt på hans evne til å setje tilsynelatande smale forskingtema inn i større samanhengar. Schulte har ei tilnærming i forskinga si som gjer problemstillingane relevante for større felt, slik at spørsmål av generell interesse vert løfta fram og drøfta.

Etter at rektor hadde overrekt prisen, kvitterte Schulte med ei spenstig takketale som på tankevekkjande vis følgde opp dekanens innleiing. Først og fremst markerte Schulte si eiga forankring i ein rik og brei humanistisk tradisjon.

Han trekte han fram to av sine store intellektuelle førebilete: Alexander von Humboldt og Johann Wolfgang von Goethe, som begge var store humanistar. Dei var på ulike vis opptekne av at forsking må vere ein del av den frie tanken, ei oppfatning også Schulte slutta seg til: "Som Goethe og Humboldt ser jeg på forskning som en del av den frie tanke - det å våge teorier og å bygge broer i en verden i stadig forandring".