Beatles og animasjonsweekend
Skaparane av Yellow Submarine
Ei rekkje kjente animatørar frå fleire land stod bak denne milepelen av ein film som gjorde så sterkt inntrykk på animasjonsbransjen og publikum då den kom ut i 1968. Amerikanaren Bob Balser var ein av to animasjonsregissørar under innspelinga av Yellow Submarine. Seinare starta han sitt eige produksjonsselskap i Barcelona der han m. a. produserte seriar som The Jackson 5, Peanuts (for CBS) og Barney (for BBC). Engelskmannen John Coates hadde det daglege ansvaret for arbeidet med Yellow Submarine. På det meste var over 200 menneske involverte i arbeidet. Han er også ein av skaparane av det kjente produksjonsselskapet TV Cartoons (TVC) i London.
Ein årleg festival i Volda
- Vi ved animasjonsutdanninga i Volda ønskjer å etablere ein årleg festival for animasjonsfilm i Volda. Feiringa av animasjonsutdanninga sitt 10-års jubileum i fjor gav meirsmak. Vi vonar at dette kan bli ein føreløpar til ein slik fast årleg festival, seier førsteamanuensis Strøm.
Styreleiar i Volda filmteater Helge Halkjelsvik, kinosjef Oddbjørn Røys og førstemanuensis Gunnar Strøm gler seg til festival i Volda. Her med eit knippe kjære minne frå 60-åra.
Programmet
Fredag 16. september vil Bob Balser med frue og John Coates undervise animasjonsstudentane på høgskulen. Om kvelden vil det bli vist studentproduksjonar på studenthuset Rokken samt animasjonsfilmar med The Beatles som sjeldan eller aldri har blitt viste i Noreg.
Laurdag 17. september opnar med eit ”vorspiel” på Rokken der Balser og Coates vert presenterte for eit større publikum. Ein vil også vise andre filmar desse har laga. Kl. 19.00 går ein så til Volda filmteater for å sjå Yellow Submarine. Så er det tilbake til Rokken der det bli høve til å stille Balser og Coates spørsmål. Til slutt blir det musikk ved Beatlejuice som spesialiserer seg på Beatles-songar. Arrangementa på laurdag er opne for alle.
Animasjonsutdanninga
Animasjonsfilmutdanninga i Volda er unik i nordisk samanheng. Studentproduksjonane vert rett som det er viste på festivalar over heile verda. Mange filmar har fått prestisjetunge prisar.
- Vi ønskjer at publikum lokalt, regionalt og nasjonalt skal får høve til å sjå kva studentane våre driv på med. Ingrediensane i ein slik årleg festival vil vere bidrag av våre eigne folk, våre noverande og tidlegare studentar og internasjonale stjerner som også skal undervise, forklarer Strøm som med sin posisjon og store kjennskap til bransjen har fått kremen av internasjonale filmskaparar til Volda ved fleire høve før.
Samarbeid med lokale krefter
Volda filmteater ved kinosjef Oddbjørn Røys og styreleiar Helge Halkjelsvik har ofte samarbeidd med studentar og ulike fagmiljø ved Høgskulen i Volda.
- No går vi saman om ein festival med ein tematikk som foreinar, nemleg kjærleiken til animasjonsfilm og Beatles, seier Oddbjørn Røys.
- Styreleiar Halkjelsvik er kanskje Noreg sin største Beatles-fan og har stor kunnskap om Yellow Submarine og historiene bak den. Han har til og med fått personleg helsing frå Paul McCartney frå scena under ein konsert i Oslo, ler Strøm.
Ihuga Beatles-fan Helge Halkjelsvik og førsteamanuensis Gunnar Strøm ved Avdeling for medifag. På skjermen
skimtar vi ein av 39 animasjonsfilmar med The Beatles som vart laga før Yellow Submarine. Desse er det svært
få som har sett her til lands.