50-årsjubileum for kyrkjelege utdanningar i Volda
Hausten 1971 kom ein i gang med undervisning ved distriktshøgskulen i Volda. Året etter kunne ein lyse ut eit studium i «Organisasjon og velferd, teologisk line». 50-årsjubiléet for dei kyrkjelege utdanningane i Volda vert markert med eit fagleg seminar, jubileumsfest og gudsteneste i samband med Forskingsdagane siste helga i september.
Programnemnda ønskjer velkommen til jubileumshelg i Volda. Frå venstre: Magnar Hjertenæs, Ralph Meier, Knut Åmås og Jan Ove Ulstein. Per Halse er også med i nemnda.
Hausten 1971 kom ein i gang med undervisning ved distriktshøgskulen i Volda. Året etter kunne ein lyse ut eit studium i «Organisasjon og velferd, teologisk line». 50-årsjubiléet for dei kyrkjelege utdanningane i Volda vert markert med eit fagleg seminar, jubileumsfest og gudsteneste i samband med Forskingsdagane siste helga i september.
Dei tre første studieretningane ved den nystarta distriktshøgskulen i Volda var norsk, media og organisasjon og velferd. Det sistnemnde studiet skulle gi studentane kompetanse i miljøarbeid, fritids- og velferdsarbeid i institusjonar, rådgjevingsarbeid, men også meir administrative oppgåver i organisasjonar, eit nokså breitt kompetansefelt.
Organisasjon og velferd, teologisk line
Det toårige studiet i Organisasjon og velferd vart i løpet av det første året delt i to: Ei allmenn linje, som etter kvart utvikla seg til sosialpedagogikk og dei treårige bachelorutdanningar i sosionom og barnevern. Den andre, Organisasjon og velferd, teologisk line, kom i gang hausten 1972. Dette studietilbodet utvikla seg snart til «KM» (kristendomskunnskap og menighetsarbeid), og vidare til «Kyrkjefag» med utdanningar for både kyrkjelydssekretærar, kateketar og kyrkjeverjer.
Jubileumsseminar
50-årsjubiléet for dei kyrkjelege utdanningane i Volda vert markert med eit fagleg seminar, jubileumsfest og gudsteneste i samband med Forskingsdagane siste helga i september.
På fredag 23. september vert det eit fagleg seminar om kyrkjeleg stillingsstruktur og utdanning til kyrkjeleg teneste.
Der vert det innleiingsforedrag ved Frank Grimstad om utviklingsdrag og framtidsperspektiv for kyrkjeleg utdanning i Noreg. Grimstad er cand. philol. med faga kristendom, pedagogikk og psykologi, og han arbeidde som kateket før han vart tilsett i Kyrkjerådet i 1980. Der la han grunnen for og fekk etablert det som no heiter «KA Arbeidsgiverorganisasjon for kirkelige virksomheter» – der han var administrerande direktør i fleire tiår. No har Grimstad ei seniorstilling ved høgskulen VID i Oslo. Han var ein viktig inspirator og rådgjevar for dei kyrkjelege utdanningane i Volda, og i foredraget vil han m.a. drage linjer frå innlegget «Kyrkja som kallsmarknad i dag og i morgon» som han heldt ved ein konferanse om kyrkjeleg utdanning ved høgskulen her i 1991.
Med bakgrunn i eigne erfaringar vil så desse tre med utdanning frå Volda kome med sine refleksjonar til tematikken: Anne Berit Laache Stokstad, Heidi Strand Mathisen og Oddvar Etnestad.
Frå venstre: Frank Grimstad, Oddvar Etnestad, Anne Berit Laache Stokstad og Heidi Strand Mathisen.
Anne Berit representerer dei som har arbeidd som kyrkjelydssekretær og også i kristeleg organisasjonsliv. Ho studerte her frå starten i 1972, og kan dele opplevingar frå dei som var pionerar (eller prøvekaniner?).
Heidi tok kateketutdanning i Volda frå 1985 til 1989, og etter fire år som kateket i Karlsøy i Troms har ho sidan 1994 vore kateket i heimesoknet Hamarøy i Nordland.
Oddvar gjekk først KM-linja 1982–1984, og så vidareutdanna han seg til kyrkeverje i studieåra 91/92 og 94/95. Han har vore kyrkjeverje sidan 1995; først i Førde, så på Kongsberg og no i Øvre Eiker.
Seminaret vert avslutta med panelsamtale og diskusjon leia av førstelektor Magnar Hjertenæs.
Omvising og jubileumsfest
På laurdagen får tidlegare studentar og lærarar lunsj i høgskulekantina – med påfølgande omvising inne og ute på høgskuleområdet. Deretter vert det jubileumsfest på Uppheim med attersyn, drøs og anna lødig program.
Gudsteneste
Søndag vert det Forskingsdags-gudsteneste med preike ved Anny Holien.
Ho tok kateketutdanninga i Volda frå 1986 til 1990, og har deretter gjort teneste som kateket i ulike stillingar i Hamar bispedøme. For tida leier ho trusopplærings-arbeidet i Østre Toten.
Etter gudstenesta vert jubileumshelga avslutta med kyrkjekaffe på Uppheim.
