Flott start for Språkpakken
Rundt 230 helsesøstre, pp-rådgjevarar, lærarar, førskuletilsette og spesialpedagogar var samla i Molde den 28. februar for første samling i femdagarskurset Språkpakken. -Vi er overvelda over god respons, seier fagansvarleg Irene Bele. -Dette syner at det er stort behov for kunnskap om verktøy for kartlegging av språkutvikling hjå barn og unge.
Høgskulen i Volda har ansvaret for gjennomføring av Språkpakken 2007. Språkpakken er eit kompetansehevingsprogram innan Kunnskapsløftet om språkutvikling og språkvanskar hos barn og unge.
Irene Bele er fagleg ansvarleg for kursopplegget. Ho har knytt til seg erfarne fagfolk frå praksisfeltet i Møre og Romsdal. -Samarbeidet mellom Høgskulen og praksisfeltet er til gjensidig nytte og avgjerande for at ideane i Språkpakken skal bli godt forankra i fylket seier Bele.
Kontoret for etter-og vidareutdanning har ansvaret for den tekniske gjennomføringa av Språkpakken.
Kurset er eit 5 dagars kursopplegg om språkutvikling og språkvanskar som Bredtvet kompetansesenter har utarbeidd på oppdrag frå Utdanningsdirektoratet. Kompetansehevingsprogrammet er ein del av Kunnskapsløftet og dei to nasjonale strategiplanane "Gi rom for lesing!" og "Likeverdig opplæring i praksis".
Språkpakken vart gjennomført i 2006 med til saman 206 deltakarar som var innom kurset i Møre og Romsdal.
Les meir om Språkpakken 2007
