Førskulelærarutdanninga vert evaluert

Evalueringa har som mål å framskaffe best mogleg kunnskapsgrunnlag for å kunne vurdere kvaliteten i eksisterande førskulelærarutdanningar, og korleis desse kan utviklast vidare sett i høve til samfunnsutviklinga generelt og endringar i rammeplanar.

Prosjektgruppe med evalueringsansvar

Ei prosjektgruppe, leia av Torhild Høydalsvik, skal organisere den interne evalueringa. Prosjektperioden, fase ein, er planlagt å vare frå 8.mars til 8. juni 2009. I denne perioden skal ulike fagmiljø drøfte og svare på både kvantitative og kvalitative spørsmål knytt til eigen organisasjon. Det skal gjennomførast både formative og summative vurderingsprosessar, i store og små grupper internt på høgskulen. Praksisbarnehagane er også med i eigenevalueringa.

Styrarar og øvingslærarar samla for å drøfte ulike sider ved førskulelærarutdanninga.

Hovudmålet for prosjektet er å gjere førskulelærarutdanninga endå betre, slik at studentane opplever eit samordna studieprogram som er fagleg og administrativ forankra. I evalueringsperioden vil ein også drøfte høgskulen sin fagprofil, nye utfordringar og spesielt HVO som lærarutdannar.

Samla i skrivestove

Faglærarane ved førskulelærarutdanninga var samla til skrivestove tysdag i 12. mai og arbeidde med evaluering knytt til pedagogisk personale.

Onsdag 13. mai var styrarar og øvingslærarar samla for å drøfte ulike sider ved førskulelærarutdanninga, og svare på spørsmål i høve evalueringa. Studieleiar ved førskulelærarutdanninga, Torhild Høydalsvik, leia og organiserte samlingane. Høydalsvik er som prosjektgruppeleiar oppteken av at alle som er knytta til førskulelærarutdanninga vert høyrde i evalueringa.