Premiere på bachelorfilm i Munchs atelier

August Volden Skara leverte til sommaren ein bachelorfilm i animasjon med ein teknikk ingen i verda før har nytta. No har den tidlegare Volda-studenten finpussa på filmen og skal 12. desember ha offisiell premiere i ærverdige Munchs atelier.

«Et møte mellom Munch og Ibsen» er filmen som Skara fekk internasjonal merksemd for i juni. Det er hans bacheloroppgåve ved animasjonsstudiet ved Høgskulen i Volda, som han fekk presentert under konferansen Society for animation studies conference i Lisboa. Oppsiktsvekkande, då det stort sette er undervisarar og forskarar med doktorgrad og endå høgare utdanning som får halde innlegg under denne konferansen.

Unik løysing

Det spesielle med filmen, som har vore svært tidkrevjande å lage, er kombinasjonen av stop motion teknologi og VR (virtuell røyndom).

– Dette prosjektet er sannsynlegvis den første samanhengande filmen i verda som gjer at ein er i stand til å bevege seg rundt i VR, der alt ein ser og opplever er fysisk skapte modellar og fysisk skapa stop motion-animasjon, berre beståande av naturleg lys og karakterar som er i stand til å bevege seg fritt rundt, utan restriksjonar, forklarar Skara.

For å skape ein bevegelse i filmen har Skara saman med kameraten Gard Hagen utvikla ei maskin som tek 70 bilde av den aktuelle figuren. Skal til dømes ei hand eller ein fot flyttast ein ny centimeter eller to, må ein ta 70 nye bilde. Alle desse bilda har Skara gjennom avansert programmering og koding klart å lage filmen av. Til kodearbeidet har han fått god hjelp av Christoffer Blomvik, som studerer Master in Media Practices ved Høgskulen i Volda.

– Veldig stas

No skal altså Skara få vist fram filmen sin i Munchs atelier i Oslo. Etter som det er ein VR-film, er det klart best å ha på VR-briller for å sjå filmen. Under premiera vil Skara sjølv ha på seg briller, og vise det han ser gjennom brillene på ein storskjerm i atelieret. 

– Det er veldig stas at eg får denne moglegheita. Etter at eg leverte filmen som bacheloroppgåve har eg gjort små endringar, perfeksjonert den og gjort alt ferdig. Difor blir dette som ei premiere å rekne. Eg gler meg, smiler karen frå Nesodden.

Premieren, der Skara også vil fortelje om prosjektet sitt, er 12. desember kl. 19.00.
Sjå meir om arrangementet på Facebook.

Lagar studio saman med kjærasten

Med bachelorprosjektet sitt har Skara også peika ut ein veg han håper vil bli eit levebrød. Ikkje berre for seg sjølv, men også for sambuaren Lea Romero. Dei to møttest då Skara var på utveksling frå animasjonsstudiet til det franske universitet ESAAP i Lille, i hennar heimland. Då Skara var ferdig med sitt opphald i Frankrike, vart Romero like godt med til Volda for å ta sitt siste år ved animasjonsutdanninga i sunnmørsbygda. No er dei begge ferdig utdanna og held på å bygge opp eit animasjonsstudio på Nesodden, der dei har ein draum om å bygge vidare på den teknikken Skara brukte i filmen «Et møte mellom Munch og Ibsen».

– Det er ei spennande tid. Vi har sikta oss inn på museum som våre framtidige kundar. Vi ønsker å lage VR-filmar der besøkande på museum kan få oppleve noko spesielt og bli dratt inn i gode historier.

Først skal Skara fortelje si historie om bachelorprosjektet sitt 12. desember. Der vil han blant anna snakke om at filmen er eit møte mellom Edvard Munch og Henrik Ibsen, lagt til ei av Munch sine siste utstillingar i 1895 og dialogen i filmen er blant anna basert på Munch si dagbok. Skodespelarar ved Nationaltheateret har stemmene til karakterane og med VR-briller kan ein bevege seg rundt i rommet i kunstutstillinga og høyre på samtalen mellom Munch og Ibsen eller få med seg kva andre i rommet gjer og snakkar om.