– Utfordrande og lærerikt arbeid

Fire Volda-studentar fekk med seg heilt spesielle erfaringar frå ein ti dagars workshop i Polen og Latvia. Resultatet kan bli at arbeidet deira vert ein del av eit senter om andre verdskrigen i Hamburg.

– Det var superinteressant. Men å jobbe i ti dagar med noko av det verste som har hendt i mennesket si historie var tøft, seier Isak Okkenhaug. Det går ei stund før neste setning kjem ut frå munnen hans. Som krigen har sett djupe spor i verdshistoria, har reisa og arbeidet sett solide fotavtrykk i minnet til studentane.

Okkenhaug, franske Amandine Ollier og italienske Matteo Baratella som alle studerer Master in Media Practices ved Høgskulen i Volda, i tillegg til Lene Flataker, bachelorstudent i journalistikk, reiste til Gdansk og Stutthof i Polen og Riga i Latvia saman med førsteamanuensisane Thomas Lewe og Kjetil Vaage Øie. I workshopen som bar namnet «Memory dialogs» samarbeidde studentar og tilsette med ti ulike nasjonalitetar frå universitet i Tyskland og Latvia, i tillegg til Universitetet i Bergen og Høgskulen i Volda.

Multimediale løysingar

Studentane arbeidde på oppdrag frå ein organisasjon som står bak Memorial Hannover Station in Hamburg – et prosjekt som skal munne ut i et museum om andre verdskrigen i Hamburg. Frå jernbanestasjonen i Hamburg vart jødar sendt med tog til ulike konsentrasjonsleirar i Europa.

Eit bakteppe og inspirasjon til gruppearbeidet fekk studentane gjennom å besøke museum, massegraver og få høyre ein gjenlevande jøde snakke om krigen og hans opplevingar av den. Dette gjennom opphaldet i Gdansk, ei reise til Riga og til Stutthoff konsentrasjonsleir ein time utanfor Gdansk.

– Vi kom fram til ulike multimediale løysingar. Videovegg med lyddusj og abstrakte bilete som kan seie noko om kjenslene vi trur jødane hadde då dei vart deportert med tog – og på den måten prøve å få museumsgjengaren til å føle at ein vert deportert, fortel Okkenhaug om si gruppe si prosjekt.

– Vi hadde også ein multimedial vegg, ein vegg der blader som låg over jernbaneskinnene på stasjonen i Hamburg flyg vekk når du nærmar deg den og så får du sjå jernbaneskinnene kome til syne. Då skal ein blant anne kunne laste ned ein app for å lese meir om historia og dei som døydde, seier Amandine Ollier om arbeidet dei gjorde.

Viktig erfaring

Volda-studentane fortel at tematikken gjorde sterkt inntrykk på dei. Samstundes var det også lærerikt – å samarbeide fagleg på engelsk med studentar frå ulike land og universitet er noko dei tek med seg som ei viktig erfaring. Finn dei som arbeidar med det framtidige senteret i Hamburg eit av studentprosjekta gode nok, vil dei bli bruke dei. Fram til det eventuelt vert aktuelt er studentprosjekta mest på idé- og skissestadiet.

Førsteamanuensis Thomas Lewe har initiert fleire liknande prosjekt tidlegare gjennom det internasjonale nettverket han er ein del av. I 2016, 2017 og 2018 tok han kvart år med seg fem mediestudentar frå Volda til Lodz i Polen. 

– Nettverket vårt har vakse dei siste åra og vi har med både medie- og historiestudentar frå universitet og høgskular i Tyskland, Polen, Latvia og Noreg, fortel Lewe.

Meir samarbeid

Formidling av kva som skjedde under den andre verdskrigen har vore sentralt i prosjekta dei har hatt med studentane i. No arbeider ein for å halde fram med liknande gruppearbeid som studentane har fått vere med på til no. Falstadsenteret i Trøndelag, som består av Falstad fangeleir og Falstadskogen, som ligg eit steinkast unna og var rettarstad for okkupasjonsmakta, er ein aktuell samarbeidspartnar.

– Vi har fått pengar frå dei og håper at vi kan halde ein workshop hos dei eit av dei neste tre åra. Dei to andre åra håper vi å ha samarbeide med det store museet Polin Museum i Warszawa. Det ser lyst ut for nettverket og framtidige studentprosjekt, meiner Lewe.