Anerkjend jazzmusikar med gjesteførelesing på musikk

I høve Internasjonal dag ved Høgskulen i Volda, fekk musikkstudentane i emnet Utøving og formidling høve til å oppleve den anerkjende jazzmusikaren Gianni Gagliardi som tok opp fleire spanande tema knytt til å vere utøvar i det 21. århundre.

Faglærar Stein Helge Solstad ved HVO vart kjend med Gagliardi via felles musikarkontakter i Brooklyn, New York og Oslo. Gagliardi, opprinneleg frå Barcelona er no busett i Sveits, og hans unike internasjonale utdannings- og arbeidserfaring er noko som studentane kan la seg inspirere av meiner Solstad.

I denne digitale førelesinga gjekk Gianni inn på mange element som er avgjerande for å lukkast som musikar i dagens samfunn. Det viktigaste han påpeika var at det å lukkast som artist krev eit sett av kunnskapar og ferdigheiter, ikkje minst knytt til promotering av ein sjølv som artist. Han nemnde m.a. at når ei plate er utgjeven, er berre ein liten del av jobben gjort. Ein må vere villig til å jobbe med promotering av produktet kontinuerleg. Det er ein evig kamp og hard konkurranse om merksemd.

Gianni er også ein ivrig forkjempar for å la musikk vere ein auditiv kunstart, og med det meiner han at øyra er heilt avgjerande både i innlæring og utøving av musikk. Kort fortalt at inngangen til musikk i første rekkje må kome via den emosjonelle opplevinga av å lytte til musikk og deretter kan teori og teknologi spele vidare på dette.

Gianni gav mange flotte eksempel på korleis det er å vere ein internasjonal utøvar og han reflekterte også over styrkar og svakheiter i dei ulike landa han har vore student og musikar. Han oppmoda studentane til å spele så mykje som mogleg og gjere seg eigne erfaringar med både øving og framføring. Dette er eit tidkrevjande arbeid, men det er også det som skal til for å lukkast.

Les meir om studietilbod innan musikk ved HVO