Kristofer og Gry Molvær Hivju til Høgskulen i Volda

Ekteparet er hovudgjestar og skal halde foredrag under markeringa av Internasjonal dag 6. februar. Den verdskjente skodespelaren vart stemt fram som studentane sin draumegjest. 

Det vert Hollywood-sus over årets Internasjonale dag på Høgskulen i Volda, med ekteparet Kristofer og Gry Molvær Hivju som hovudgjestar og foredragsholdarar. 

- Vi ønskjer foredraget skal inspirere studentar og tilsette ved Høgskulen til å vurdere å reise utanlands, sjå verdien av internasjonale erfaringar og impulsar, og våge å tenke litt stort. I så måte er ekteparet Hivju perfekte inspirasjonskjelder, seier Iulia Beleuta og Marthe Osmundsen ved Internasjonalt kontor på Høgskulen i Volda. 

Dei avslører at studentane svara på ei undersøking etter fjorårets dag, der dei fekk stemme fram sin draumegjest. Der vann Kristofer Hivju med klar margin.

- Det er heilt strålande at studentane fekk ønskjet sitt oppfylt, seier Osmundsen.

Game of Thrones-giganten

Kristofer Hivju treng knapt nærare presentasjon etter suksessen i rolla som Tormund Giantsbane i HBO-serien Game of Thrones. Han er også kjent frå rollar i mellom anna Fast and the Furious, The Thing, After Earth og Beck. Han studerte teaterkunst ved Det statlige russiske akademi for teaterkunst i Danmark. Les meir om Kristofer Hivju her. 

Gry Molvær Hivju kjem frå Sula på Sunnmøre, og har sjølv studert ved Høgskulen i Volda. Ho har både medieutdanning, statsvitskap, internasjonal politikk og kunstfag på CV-en, og var med i første kull av NRK-storsatsinga «MasterClass» for utvalde regi- og produsenttalent. Ho har ei lang og variert karriere innan forskingsjournalistikk, foto og dokumentarfilm bak seg. Molvær Hivju har vore juryleiar for Kulturdepartementets nynorskpris i åtte år, og har vunne Kringkastingsprisen, Folkeopplysningsprisen og ei rekkje språkprisar. 

 
Fleire stjerner på plakaten

Internasjonal dag sparar ikkje på kruttet: Nytt av året er eit gratis kveldsshow på Rokken. Der har arrangøren fått med seg Julien S. Bourrelle på laget. Han er mellom anna kjent for boka «The Social Guidebook to Norway», som har seld meir enn 50 000 eksemplar. Han har også stifta Mondå Forlag AS, med eit mål om å publisere bøker som skal byggje bruer mellom kulturar og bidra til å auke mangfald i samfunnet. 

- Julien S. Bourrelle er ein skikkeleg spanande gjest, og vi er glade for å utvide arrangementet med eit slikt type show. Dette skal bli morosamt, seier Osmundsen.
 

Inspirasjon til å søke seg utanlands

Hovuddelen av Internasjonal dag foregår imidlertid på Berte Kanutte-huset ved Høgskulen som vanleg. Der vert det mogleg å treffe gjestar frå partneruniversitet, internasjonale studenter som studerer i Volda, og lokale studentar som har vore på utveksling. Totalt har arrangøren invitert 25 gjestar frå 18 ulike partnarland. Det kjem representantar frå mellom anna Storbritannia, Russland, Tyskland, Spania, Portugal og Romania. 

- Vi håper alle studentar og tilsette vil bli med oss og markere dagen. Her får de inspirasjon og informasjon kring det å studere, hente impulsar eller få fagleg påfyll utanlands, seier Beleuta og Osmundsen. Dette er ei unik moglegheit til å kunne stille spørsmål direkte til institusjonar ein kunne tenke seg å utveksle til. 

Arrangøren minner om at studie- og tilsettbevis må visast fram for å delta, og oppmoder om å møte opp tidleg for å få plass. 

Hovudgjestane Kristofer og Gry Molvær Hivju går på scena på store BK kl. 12.00 6. februar.