Samarbeid for å tette gapet mellom utdanning og praksis
- Dette var nyttige og inspirerande dagar! Lærarutdannarar, tilsette frå praksisfeltet og studentar frå Høgskulen i Volda samla seg om korleis praksis for lærarstudentar kan bli enda betre.
Nyleg var over 100 lærarutdannarar samla til seminar for grunnskulelærarutdanningane i Loen. Her møttes tilsette ved praksisskulane og faglærarar ved grunnskulelærautdanningane, saman med tillitsvalde studentar. Målet med seminaret var å bygge bru i praksissamarbeidet og auke kvaliteten i grunnskulelærarutdanninga.
– Det var gledeleg at studentstemma var så tydeleg, både i gruppesamtalar og i interessante bidrag i plenumssamlingane, kommenterer Eivind Hanevik og Kjersti Markegård ved grunnskulelærarutdanninga.
Bjørn Smestad, dosent II ved Høgskulen i Volda, innleia fellesseminaret med foredraget Lærarutdanning og lærarutdannaridentitet, og snakka her om korleis vi kan hjelpe studentar på lærarutdanninga med det opplevde gapet mellom det som skjer på høgskulen og det som skjer i praksisfeltet. Som lærarutdannarar kan vi alle bidra til minske gapet, og bygge bruer som kan hjelpe studentane til å sjå samanheng mellom det som blir sagt og gjort på dei to arenaene.
I programposten "Sofaprat med erfaringsdeling frå praksis", kom det godt fram at denne brubygginga skjer og det kom gode dømer på at det er meir kontakt mellom praksislærarane og faglærarane på høgskulen no enn det var før.
I den meir uformelle økta "Teachmeet", med lykkehjulsnurring og nedtellingsklokke, fekk deltakarane på seminaret spennande og interessante glimt inn i praksislærarar, faglærarar og studentar sine kvardagar.
Gjennom seminaret kom det fleire faglege påfyll, mellom anna spennande resultat frå forskingsprosjektet Digihand, med resultat mellom anna knytt til bruken av nettbrett.
Forsking på eiga undervisning
Dag to var sett av til arbeid med Lesson Study, der professor Elaine Munthe gav ei interessant og inspirerande innføring i korleis vi kan forske på eigen undervisning, og gjennom forsking og refleksjon auke kvaliteten i undervisninga.
Førsteamanuensis Pernille Fiskerstrand sitt foredrag "Lesson Study – djupnelæring for lærarar" var eit interessant døme på korleis Lesson Study kan arte seg i praksis. Lærarutdannarar og studentar fekk også høve til å diskutere korleis ein kan bruke Lesson Study i lærarutdanninga, kva utfordringar vi ser og kva moglegheiter metoden kan gje.
Under eit slikt seminar er det ikkje berre det faglege programmet som er viktig, men også den uformelle praten i pausene og rundt matbordet. Prorektor Odd Helge Tonheim understreka i si oppsummering av seminaret, at den sosiale kontakta er svært viktig, for her ligg spiren til nye samarbeid.
Om vi som lærarutdannarar skal greie å hjelpe studentane til å ikkje gå i spagaten i avstanden mellom campus og praksisfeltet så er det viktig at vi er vårt ansvar bevisst. Tonheim oppmoda deltakarane om å ta kontakt med kvarandre for tips, innspel og samarbeid om fagleg utvikling: «Slik kan vi bygger bruer og samarbeid som igjen vil byggje ei betre grunnskulelærarutdanning».