Volda-studentar sin empati vart presentert og diskutert i Spania

I møte med forskarar frå Spania, Mexico, Colombia og Venezuela har Volda-professorane Torhild Høydalsvik og Roar Stokken lagt fram og diskutert den empatiske profilen til studentar ved Høgskulen i Volda og Høgskulen på Vestlandet.

Høydalsvik fortel at ho opplever at det faglege perspektivet frå Volda både vert lagt merke til og vert lytta til i Granada. 

– Særleg det at vi set empati i samanheng med skjønnsutøving, profesjonsutøving og profesjonsetikk har blitt viktig i diskusjonane, seier Høydalsvik.

Auke kvaliteten i skule og barnehage

Det er Universitetet i Granada som står bak konferansen Høydalsvik og Stokken har bidrege i. Utgangspunktet er eit prosjekt finansiert av utdanningsministeriet i Andalucia. 

Målet er å auke kvaliteten i lærarutdanninga, og dermed også indirekte på skular og barnehagar. Leiaren av prosjektet og leiar av konferansen, Professor Pérez García, er svært takksam for å ha med det skandinaviske perspektivet i arbeidet. 

– Vi finn stor nytte i å sjå norske praksisar og empatien til dei norske studentane i lys av det som er og skjer i Spania, seier Høydalsvik og Stokken. 

Tett samarbeid med Granada

Høydalsvik har i mange år hatt både eit godt og tett samarbeid med lærarutdanninga i Granada. Det som vart presentert i Granada denne gongen byggjer på arbeidet til medlemmer i forskingsgruppa «Empathy». Gruppa har medlemmer frå sosialarbeidar- og lærarutdanningane i Volda og Sogndal. 

Det er ikkje berre Høydalsvik og Stokken som står bak arbeidet som vart presentert i Granada. Også Kristin Ljoså Sørheim (HVO), Kirsten Flaten (HVL) og Margrete Stave Aksnes (HVL) er viktige bidragsytarar.