Karrieredagar for over 2000 elevar
Høgskulen i Volda vil 10., 11.og 12. november ta imot over 2000 elevar frå grunn- og vidaregåande skular til karriereveiledning. - Ei viktig målsetting for karrieredagane er å gje elevane eit levande bilde av arbeids- og utdanningstilbod i regionen, seier rektor Jørgen Amdam.
Denne forma for karriereveiledning er del av eit nytt fag i skulen som heiter "Utdanningsval". Målet for faget er å gje elevane betre føresetnadar å gjennomføre utdanningsløpet sitt. Elevane skal også få betre grep og kunnskapar om ulike utdanningsvegar og yrke gjennom betre karriereveiledning og utprøving i arbeidslivet.
Samarbeid
Karrieredagane er eit prosjekt initiert av Møre og Romsdal fylke. Nytt av året er at den tradisjonelle Yrkesmessa på Søre Sunnmøre har blitt slått saman med Karrieredagane. Elevane skal difor vere ein halv dag ved Høgskulen i Volda og ein halv dag i Herøyhallen der ulike verksemder på Søre Sunnmøre skal stå for det faglege opplegget.
Elevar frå alle kommunene i Sjustjerna vil få innblikk i ulike utdanningsvegar og yrke.
Stort
- Dette er ei formidabel oppgåve for oss. Til saman vil om lag 2100 elevar frå Ørsta, Volda, Vanylven, Sande, Herøy, Ulstein og Hareid kome til høgskulen over tre dagar, rundt 700 kvar dag, seier prosjektleiar Torill Engeseth og logistikkansvarleg Eirik Beck.
Mange moglegheiter
- Årets tema for Karrieredagane 2009 er "Dobbelt så mange moglegheiter". Ei klar målsetting for Karrieredagane er å vise fram dei mange spanande arbeids- og utdanningstilboda vi har i fylket, seier Engeseth.
