Rådgjevarrolla på dagsorden
- Eg føler det er nyttig å få ein heil dag med fokus på rådgjevarrolla, kommenterte Astrid Falkum, rådgjevar ved Sykkylven vidaregåande skule. Ho tok del på Rådgjevarseminaret 2005 ved Høgskulen i Volda, som tok føre seg utfordringar ved rådgjevarrolla i dag.
Av: Ingrid Redse Mjaaseth
Rådgjevarar frå heile regionen var samla ved Høgskulen i Volda for å setje fokus på utfordringar ved rådgjevarrolla.
Rådgjevartenesta si rolle
- Rådgjevarar har ei viktig rolle i Kunnskapsløftet i skulen, i tillegg til å halde på rekrutteringa til lokale næringar, fortalde prosjektleiar i Næringsliv i skolen, Guttorm Ulla.
Guttorm Ulla, Næringsliv i skolen
- OECD sin rapport om rådgjevingstenesta frå 2002 skriv om ei fragmentert, mangelfull rådgjevingsteneste med svak profesjonalitet. Det vert sett for stor fokus på mykje informasjon til elevane, i staden for faktiske råd for den enkelte.
Utfordringa
- Utfordringa vert å rekruttere unge til fag der behovet er størst. Dette krev eit godt samspel mellom verksemder og utdanning, der ein spissar innhaldet i opplæringa og rettleiinga elevane treng på vegen inn i yrkeslivet, seier han.
- Ein vil oppleve ein auke i behovet for individuell rettleiing som gir samanheng og heilskap for eleven i utdanning og yrkesval. Utfordringa ligg i innhaldet for god kompetanseheving også for rådgjevarar, i tillegg til sjølve organiseringa av rådgjevar-, eller karriererolla.
- Rådgjevaren må i større grad lære elevane å ta val i staden for å gjere vala for elevane, konstaterte Ulla.
Det individuelle valet
Astrid Falkum frå Sykkylven vidaregåande skule peika også på utfordringa i å vere ein god rådgjevar for elevane.
- Tid og ressursar er som regel for knappe, meiner ho.
- Ofte må ein ta lettvinte løysingar med berre ved å gje elevane mykje informasjon.
- Det ideelle er å ha tid til å setje seg ned å hjelpe kvar einskild elev med sjølv å ta val ut frå den informasjonen som er tilgjengeleg.
