Verdens bokdag i Volda

Fride Fiskergård Vidnes (12), Ingrid Telset Heltne (11), Camilla Humberset (12) og Andreas Brandal (11) framfor utstillinga av arbeida deira.

- Og så får vi kvar si bok, fortel dei entusiastiske elevane.
- Vi skal lese meir, og skal ha utstilling av det vi har laga. Så skal vi verte meir kjende med biblioteket.

Bokgåva

- Bokgåva er ein del av tiltaksplanen "Gi rom for lesing" og har vorte til gjennom eit samarbeid mellom Læringssenteret og Verdens bokdag-komiteen, fortel avdelingsbibliotekar Anne Marit Huse.
- Elevane kan velje mellom seks pocketutgåver av ei handplukka samling barnebøker. For å få denne boka må elevane framvise ein boksjekk i bokhandelen. Alle dei tre bokhandlane i Volda er med på prosjektet, fortel ho.

Bakgrunnen for Verdens bokdag

UNESCO bestemte i november 1995 at 23. april skal vere verdens bok- og opphavsrettsdag. Lokale arrangement skal skape merksemd rundt boka på denne dagen. UNESCO arbeider for å styrke leseevna hjå folk i alle land, auke bokproduksjonen og verne om opphavsretten til forfattarane.

FNs erklæring om menneskerettar slår fast at alle menneske har rett til frie ytringar og frie meningar og rett til å skaffe seg informasjon. Internasjonalt er situasjonen for ytringsfridom og informasjonsfridom enno svært langt frå Erklæringa sine mål.