Masterstudentane Synne Øye Myrvold, Live Andrea Sulheim og Tone Solhaug er ivrige turgåarar og brukar hengekøye som avkobling i travle eksamenstider.

 

– Pulsen går ned på hengekøyetur. Ein lever i tempoet til naturen, fortel Tone.
Jentene har nettopp lagt bak seg ein intens eksamensperiode. Det vesle pusterommet fjellturane gav var gull verdt for masterstudentane i innspurten.

Med rosa og lilla hengekøyer tek dei fatt på både korte og lange fjellturar i nærområdet. Hengekøyene kan stappast ned i ein pose som kan minne om ei banan, og tar ikkje noko særleg stor plass i ryggsekken.

– Vi var stressa og lei av lange dagar på biblioteket, fastslår Tone. Jentene nikkar og fortel at dei trengte å komme seg ut i naturen for å kunne koble av.

 

Naturen var avgjerande

Turvenninnene studerer master i praktiske mediefag ved Høgskulen i Volda. Synne og Tone vaks opp med den flotte naturen på Sunnmøre rundt seg.

– Det er ikkje så mykje anna å gjere på her, seier Tone og ler. Ho legg til at foreldra hennar var flinke til å ta henne med på tur då ho var lita.

Live kjem frå Lom og har vandra mykje i Jotunheimen i oppveksten.
– Naturen var heilt avgjerande for mitt val av studiestad, innrømmer ho.

Inspirasjon frå Instagram

Instagram er ei stor inspirasjonskjelde for jentene. Her får dei mange gode idear til nye fjell dei ynskjer å bestige. Det var slik dei oppdaga at hengekøye kunne vere eit alternativ til overnatting i telt.
– Eg såg bilde på Instagram av hengekøyturer og vart inspirert, fortel Synne.

Butikksjef ved Intersport i Volda, Linda Sefland, fortel om stor pågang på dei populære hengekøyene «Ticket to the Moon».

– Den har vore ein stor «hit». Hengekøya har slått alle rekordar og var i ein periode i sommar utseld på landsbasis. Vi fekk ikkje påfyll før i september,
seier butikksjefen som trur hengekøyene blir ei populær julegåve i år.

– Hengekøyeturane våre er ein lågterskeltur, meiner Tone og legg til at ein treng ikkje å gå i meir enn ti minutt.

 

Mykje regn på Sunnmøre

Ein må smørje seg med tålmod når ein bur på Sunnmøre. Det har jentene fått erfare etter ein regnfull haust.

– Vi hadde ein utruleg fin sommar, men i haust har det verkeleg ikkje vore mange anledningar til å overnatte i hengekøye, hevdar Tone.

– Det går jo an å overnatte ute sjølv om det regnar, fastslår Live. Jentene nikkar og fortel at dei enno ikkje har opplevd å fryse når dei søv ute i hengekøye.
– Det gjeld å kle seg godt, seier Synne.

Har de gode tips til folk som har lyst til å komme seg ut på tur?
– Ikkje planlegg for stort. Du må begynne i det små, meiner Live og legg til at det er mange turar som er godt merka og enkle å finne utan kart og kompass.

Synne meiner det er mange fjell i området som ikkje er av høgaste vanskegrad, og som uerfarne fjellgåarar enkelt kan klare.

 

Rom for alle i naturen

NRK skreiv tidlegare i haust om friluftsbloggar Tonje Blomseth, som har tatt eit ordentleg oppgjer med deling av «perfekte» og oppdolla turbilder på sosiale medium. Ho meiner det er for stort fokus på å sjå bra ut og vise fram kropp når ein går i fjellet.

– Du vel sjølv kven du vil følgje på Instagram, konkluderer Live. Jentene nikkar.

– Det er rom for alle i naturen. Det viktigaste er at folk kjem seg ut, avsluttar Tone.

 

Tekst: Marita Solheim