Emneplanen er utarbeidd i samsvar med nasjonale retningslinjer for Pedagogikk og elevkunnskap, grunnskulelærarutdanninga 1-7. Emnet er første del av faget Pedagogikk og elevkunnskap, og tilsvarar 13 stp. pedagogikk og 2 stp. religion, livssyn og etikk.   

Emnet tek føre seg læraren si tilrettelegging for elevane si læring og utvikling på 1.-7. trinn, med særleg vekt på begynnaropplæringa. Det vert teke utgangspunkt i fire område som grunnlag for utvikling av profesjonskompetanse. Desse områda er lærarrolla, læringsteori, didaktikk og læringsleiing. Det er læraren sitt arbeid i møte med eleven, elevgruppa og lærestoffet som er i sentrum. Forskingsbasert kunnskap om læring og undervisning står sentralt.

I og med dette er studentane sitt første møte med faget Pedagogikk og elevkunnskap, legg ein vekt på at dei skal få rettleiing i arbeidet med forståing for dei sentrale innhaldselementa i emnet. Arbeidskrava har til hensikt å støtte studentane i denne prosessen, gjennom rettleiing og øving i munnlege og skriftlege uttrykksformer. Undervisninga kombinerer førelesing som gir fagleg fokus og arbeidsmåtar som stimulerer aktiv deltaking frå studentane. Studentane skal vere aktiv deltakande i alle seminara knytt til arbeidskrava.

Studentane skal få ei første erfaring med forskingsarbeid knytt til praksis. Dei skal  gjennomføre systematisk observasjon av læraren sitt arbeid, analysere og rapportere denne skriftleg i grupper. Gjennom dette vert dei kjende med observasjon som vitskapleg metode, får kjennskap til kva lærarens arbeid kan dreie seg om, og får ei første innføring i akademisk skriving i faget.  Eksamen i emnet er ein skriftleg skuleeksamen, som etterspør kunnskap om sentrale innhaldselement som er nødvendig for profesjonell yrkesutøving.