Dette emnet gir ei innføring i korleis kunstig intelligens (KI) kan brukast i formative vurderingsprosessar. Emnet vil gi deg innsikt i utfordringar, men også korleis KI kan støtte og påverke ulike vurderingsformer, inkludert skriftlege oppgåver, munnlege presentasjonar, praktiske oppgåver og gruppeprosjekt. Målsettinga er å gjennom utviklingsarbeid sette læraren i stand til å vurdere om, når og korleis KI kan takast i bruk i formative vurderingsprosessar, for å støtte opp under elevane si læring. Ved slutten av emnet skal studenten vere i stand til å vurdere relevansen av å ta i bruk KIverktøy i formativ vurdering, og integrere læringsfremjande bruk av KI i eigen undervisning. I det praktiske arbeidet vert det gitt høve til å fokusere på ønska aldersgruppe og fagområde. Målgruppa for emnet er lærarar i grunn- og vidaregåande skule. Studiet har tett fagleg oppfølging, framovermeldingar og gir høve til samarbeid eller individuelt læringsarbeid. Til eksamen leverer kvar student ei eksamensmappe, basert på arbeidskrav ein jobbar med undervegs.