Med data og Dustefjerten inn i nynorsken
Lesegranskingar syner at born i nynorskområde treng å møte meir nynorsk i kvardagen, slik at dei vert trygge og gode språkbrukarar. Torsdag 17. april skipar difor Nynorsksenteret til konferansen Språkstimulering. Konferansen, som skal vere i Bergen, samlar 140 interesserte deltakarar. Frå ulike innfallsvinklar skal fagfolk og forfattarar ta føre seg korleis born kan ta dei første stega inn i den nynorske skrifta, til dømes gjennom bruk av den nynorske barnelitteraturen eller språkstimulering på datamaskina.
– Små born har eit stort potensial for språklæring. Det å få born til å leike med språket skaper språkleg medvit, seier Anne Steinsvik Nordal, leiar for Nynorsksenteret.
På konferansen vert det òg lansering av den nye antologien Les for meg!, som Nynorsksenteret gjev i gåve til norske barneskular og barnehagar. Antologien er tenkt som ein døropnar inn i det rike skattkammeret som den nynorske barnelitteraturen er. Rune Belsvik, ein av dei mange forfattarane som er representerte i antologien, er dessutan mellom innleiarane på konferansen.
Konferansen skal vere på Radisson SAS Hotel Norge i Bergen torsdag 17. april kl. 09.00–15.30.
Program for konferansen: http://www.nynorsksenteret.no/konferanse/
