Velkommen til nytt studieår!
Det er høg aktivitet på Høgskulen i desse dagar. Mange studentar er allereie på plass i Volda, for å orientere seg på campus og ordne diverse praktiske ting.
Gler seg til fadderveke og nye studentar
Leiaren for Studenttinget er å finne på kontoret i 1. etasje i Berte Kanutte-huset. Det er hektiske dagar, og han fram til å prate med medstudentar over ein kaffi på det nyoppussa kontoret.
- Eg gler meg veldig til å komme i gang. Det er kjekt, men det har vore mykje arbeid no fram mot studiestart. Det er givande å sjå resultatet - alle fadderane i aksjon og saker som vi i STIV hadde på agendaen i fjor. Det nytter å engasjere seg, seier Ole Martinus.
Leiar i Studenttinget, Ole Martinus Breivik og fadderansvarleg Jenny Ekrem Skjærseth
Også fadderansvarleg Jenny er på plass i Volda. Ho er oppteken med å instruere og organisere fadderane.
- Det går svært bra så lang. Det er mange som hjelper til og dei fleste av fadderane er på plass. I dag pakker vi fadderpakkar, deler ut t-skjorter og informerer. Kva som er i fadderpakken er ei overrasking til i morgon, smiler Jenny lurt.
Fadderane er godt i gang med organiseringa av årets fadderveke og gler seg til å treffe nye studentar.
Fadderveka har eit spennande program med aktivitetar som kan passe for dei fleste. Sjå heile fadderprogrammet her.
- Volda er ein utruleg kjekk plass å studere med mange hyggelege folk. Eg håper du finn deg til rette, og at fadderveka gir deg ein godt start. Møt opp og bli kjent, seier Jenny.
- Til alle studentar, gamle som nye, vil eg minne om at ein aldri er aleine i Volda. Om det skulle vere problem eller noko som er vanskeleg, er det alltid nokon å prate med anten det er fagleg tilsette, Sørvistorget, medstudentar, rådgjevar eller Studenttinget. I STiV er vi fem personar i styret og alltid ein på kontoret. Målet er å gjere kvardagen betre for alle!
Er du ny student bør du sjå etter Vegvisaren for nye studentar som ligg rundt om ¨på campus. Den gir deg informasjon over viktige tilbod og stadar på Høgskulen.
Sjå programmet for opningsseremonien og dei avdelingsvise orienteringane her.
Lykke til med studiestart og god fadderveke!