Drama med eksamensframsyningar
Fredag den 21.mai hadde to grupper i andre klasse ved Bachelor i teater og drama eksamen i dokumentarteater. Tema var incels, om menneske som lever i ufriviljug sølibat, og fenomenet sugardating. – Dette er viktige og relevante tema fortalt gjennom vandreteater og interaktivt teater, seier fagleg ansvarleg førstelektor Vibeke Preus.
Sugarbabes. Frå venstre: Samira Ali Sørensen, Andrea Lone Espeseth, Elizabeth Mørkestøl, Camilla Pasion Isaksen og Pernille Fynbo Gadhede.
Fredag den 21.mai hadde to grupper i andre klasse ved Bachelor i teater og drama eksamen i dokumentarteater. Tema var incels, om menneske som lever i ufriviljug sølibat, og fenomenet sugardating. – Dette er viktige og relevante tema fortalt gjennom vandreteater og interaktivt teater, seier fagleg ansvarleg førstelektor Vibeke Preus.
I emnet Samtidsteater vert teaterproduksjon nytta som læringsmodell. Studentane får undervisning i planlegging, konseptutvikling, produksjon og formidling. Sentralt er ulike produksjonsprosessar, skodespelarteknikk og scenekunstnarlege strategiar. I denne typen teaterproduksjon er alle medlemmane i gruppa med i den kreative prosessen frå idé til framføring.
– Dei to gruppene har valt det vi kallar dokumentarteater som sine eksamensframsyningar. I dokumentarteater gjer studentane research basert på intervju, ulike dokument, politiske høyringsnotat, lydopptak, nyheiter, film og tv-reportasjar. På dette grunnlaget utviklar dei ei framsyning der ein eksperimenterer med ulike element frå samtidsteater, seier førstelektor Vibeke Preus
Sugarbabes
I ein av teatersalane i Henrik Kaarstad-huset framførte ei av gruppene eit stykke om fenomenet «sugardating». I dokumentarar på TV og i avisoppslag kan vi lese om unge, attraktive kvinner som får pengar, reiser og gåver for å date eldre, velståande menn.
– Eit sentralt spørsmål er om dette er uskyldig dating eller rein prostitusjon, seier Elizabeth Mørkestøl som spelar ei ung jente oppsøker miljøet i håp om å tene nokre raske kroner.
Bachelor i teater og drama
– Bachelorutdanninga i teater og drama i Volda er ei solid og allsidig utdanning i eit utøvande og svært aktivt fagleg miljø. Vi tilbyr ein unik kombinasjon av praktisk skodespelartrening og ei teoretisk-akademisk utdanning som vil gje deg eit godt grunnlag for vidare arbeid som scenekunstnar innan det frie kulturlivet. Vi har eigne teaterlokale, kostyme- og scenografilager, eige lydstudio og verkstad. Følg oss gjerne på Facebook, avsluttar Vibeke Preus.
