Kaarstadfestivalen 2017
– Studentar og tilsette ved Avdeling for kulturfag ønskjer alle velkomne til ei veke med konsertar, utstillingar, teaterframsyningar og kulturcafé, seier førstekonsulent Catarina Andersson. Kaarstadfestivalen 2017, den tredje i rekka så langt, tek til søndag 28. mai.
– Kaarstadfestivalen har som mål å skape ein arena, eit utstillingsvindauge og ein møteplass der dei dyktige og kreative studentane ved drama og teater, kunst, formgjeving og handverk, musikk, medie- og kommunikasjonsteknologi kan møte publikum gjennom ei rekkje ulike kulturarrangement av høg kvalitet, seier Catarina Andersson.
– Dei fleste arrangementa skjer i Henrik Kaarstad-huset, men noko av programmet er lagt til studenthuset Rokken, Gamlegymnaset i Volda (Maurtua) og Brakketun, opplyser Andersson. Sjå kart.
Ønskjer publikum hjarteleg velkomne til Kaarstadfestivalen 2017. Frå venstre: Stein Helge Solstad, Ann-Sofi Nærø Ytterland, Eivind Karlsen, Catarina Andersson , Sondre Grimstad Arnesen og Robin Winsrygg.
Drama
I førestillinga ”Grab ‘em by the blomkål» ønskjer førsteklassa ved Seksjon for drama og teater å undersøkje parallellar mellom mellomkrigstida i Tyskland og vår eiga samtid.
«Grab ‘em by the blomkål» er ei førestelling fritt etter den tyske dramatikaren Bertolt Brecht sitt stykke Arturo Ui. Stykket syner på ein satirisk måte korleis Hitler kom til makta i Tyskland. Brecht flytta historia om Hitler, riksdagsbrannen og dei lange knivars natt til grønsaksmarknaden i ein middels stor by. Med dette latterliggjerande grepet seier Brecht at historia om Hitler eigentleg ikkje er unik, men at det som skjedde kunne ha skjedd kvar som helst og når som helst, og ikkje minst at det kan kome til å skje igjen. Dette stykket er difor like mykje ei åtvaring som det er en komedie.
Dramastudentane med viktig kommentar i stykket "Grab 'em by the blomkål".
Vil bli smed
Eivind Karlsen går tredje året på bachelorutdanninga i kunst og handverk. Under Kaarstadfestivalen 2017 skal han mellom anna vise fram arbeid som han har laga i smia i ein av dei mange verkstadane i Kaarstad-huset.
– Eg likar å jobbe med metall på den gamle måten. Etter eg er ferdig med utdanninga mi her i Volda ønskjer eg skape meg ei eiga verksemd der eg vil arbeide med tre og metall, seier han.
Eivind Karlsen stiller ut arbeid under Kaarstadfestivalen 2017.
Konsertar
Årets festival byr på heile sju konsertar frå studentar ved musikkutdanninga. Konsertane er ein del av den endeleg bacheloroppgåva i siste året av den treårige bachelorutdanninga.
Sondre Grimstad Arnesen (til venstre) og bandet hans skal framføre eigenkomponert musikk inspirert av musikalske førebilete som Thomas Dybdahl, Prince og Bowie. Robin Winsrygg med band skal framføre musikk av Steely Dan, Toto og Michael Jackson. – I bacheloroppgåva mi har eg sett på kva musikalske element som er viktig å legge vekt på i framføringa av andre komponistar sin musikk., seier han.
– Her får publikum høyre alt frå bluegrass til heavy metal, seier seksjonsleiar ved musikkseksjonen Stein Helge Solstad.
Konsertane vert avvikla på Rokken og i den nye konsertsalen i Henrik Kaarstad-huset.
– Det tek berre fem minutt å gå mellom desse lokala, så det er råd å få meg seg ei heil konsertrekkje desse dagane sjølv om konsertane er på to ulike scener, seier han.
Foto, kunstutstillingar og filmsnuttar
Under det meste av festivalveka kan publikum sjå utstilte fotografi og kunst på Maurtua (Gamlegymnaset i Volda), i Kaarstad-huset og i Brakketun.
I Kaarstad-huset kan ein sjå utstillinga Creative Commercial Photography. På Maurtua og i Brakketun vert det utstillingar av studentarbeid i ei rad ulike teknikkar.
Program
Søndag 28. mai
19.00: Stanislavskijsalen (teatersalen i Kaarstad-huset) Teater: Grab ‘em by the blomkål
Mandag 29. mai
08.00-16.00: Kaarstad-huset ved verkstadane Utstilling: Creative commercial photography
11.00-18.00: Kaarstad-huset (K100) Café Kaarstad. Gratis kaffi og vaflar.
11.00-18.00: Kaarstad-huset (K100) Filmsnuttar: Prosessarbeid av “Objekt i rom”
12.00: Stanislavskijsalen (teatersalen i Kaarstad-huset) Teater: Grab ‘em by the blomkål
18.00-19.00: Gamlegymnaset (Maurtua) Opning: Utstilling av studentarbeid
19.00: Stanislavskijsalen (teatersalen i Kaarstad-huset) Teater: Grab ‘em by the blomkål
Tysdag 30. mai
15.30-19.00: Gamlegymnaset (Maurtua) og Brakketun Utstilling: Studentarbeid ved kunst og handverk
08.00-16.00: Kaarstad-huset ved verkstadane Utstilling: Creative commercial photography
18.00: Rokken Konsert: Christoffer Jensen
19.00: Konsertsalen, Kaarstad-huset Konsert: Arne Langeland
20.00: Rokken Konsert: Olai Tomasgard
21.00: Konsertsalen, Kaarstad-huset Konsert: Joar Sæten Birkeland
Onsdag 31. mai
08.00-16.00: Kaarstad-huset ved verkstadane Utstilling: Creative commercial photography
15.30-19.00: Gamlegymnaset og Brakketun Utstilling: studentarbeid ved kunst og handverk
16.00: Rokken Konsert: Sondre G. Arnesen
17.00: Rokken Konsert: Erik Vinje
18.00: Rokken Konsert: Robin Vinsrygg
Torsdag og fredag 1. juni og 2. juni
18.00: Gamlegymnaset og Brakketun Utstilling: Studentarbeid ved kunst og handverk
08.00-16.00: Kaarstad-huset ved verkstadane Utstilling: Creative commercial photography
...
Glimt frå Kaarstadfestivalen 2016
