Med Rotevatnet som bakteppe
Studentar ved Drama årseining går på skift for å feste Rotevatnet gjennom eit heilt døgn til film. Filmen skal bli del av scenografien til eksamensforestillinga, Under overflaten, med premiere den 29. mai.
Inger Beathe T. Kvalnes, Aylin Campos, Anita Valderhaug og Torill Giskegjerde er i gang med første nattskift: Frå klokka åtte om kvelden til klokka to om natta. Videokameraet har allereie surra og gått i tolv timar. No er det deira tur til å syte for teknologien. To minutt med filming kvar halvtime. - Dette blir kjempestilig!
- Filmen frå Rotevatnet skal tene som scenografi til stykket vårt. Medan skodespelarane er på scena, i om lag nitti minutt, kan ein sjå eit heilt døgn passere i på storskjerm i bakgrunnen, forklarar dei.
Aylin Campos, Inger Beathe T.Kvalnes og Torill Giskegjerde har nydeleg utsikt medan scenografien blir til.
Instuktør og emneansvarleg for Praktisk teaterarbeid og teaterteori II , Vibeke Preus Bech er stornøgd med innsatsen. - Studentane har gjort ein kjempejobb under heile denne produksjonen! Stykket krev mykje av skodespelarane, og eg trur denne litt spesielle scenografien vil utgjere prikken over i-en, seier ho.
Bech ønskjer velkomen til ei visuell, variert og spanande forestilling når Under overflaten blir synt for publikum i slutten av månaden.
