Ny søknadsfrist på velferdsmidlar frå SfS
Studentsamskipnaden for Sunnmøre deler kvart semester ut midlar til lag og organisasjonar ved Høgskulen i Volda. Då fristen for å søke gjekk ut 15. februar var det berre kome inn to søknadar. Difor har søknadsfristen blitt forlenga til 15. mars.
- Vi syntest det var overraskande at ikkje fleire lag og organisasjonar ville ha velferdsmidlar dette semesteret, seier leiar i SfS Jan Henning Egset, - det er difor vi har valt å utvide søknadsfristen.
Om ditt lag eller din organisasjon ønskjer å motta velferdsmidlar frå SfS dette semesteret, må de syte for å fylle ut ein søknad så snart som mogleg. Du kan få eit søknadsskjema ved å kontakte Studentsamskipnaden for Sunnmøre.
