GODE SAKSBEHANDLARAR

Målretta, effektiv og rettsriktig tenesteyting føreset god forvaltning/ saks­behandling ved tildeling, endring og bortfall av helse- og omsorgstenester.

EI SPENNANDE VIDAREUTDANNING

Studietilbodet er eit samarbeid mellom Høgskulen i Volda og Per Gammelsæther i IKKS (omsorgsjuss.no). IKKS har i ei årrekkje arbeidd tett opp mot og saman med kommunar si helse- og omsorgs­teneste og kan tilføre mykje praksis­nær kunnskap i studiet. Dette styrker utdanninga sin relevans for praksisfeltet.

Studiet skal gi deg god oversikt over rettigheiter og plikter innanfor ulike sentrale tema i helse- og omsorgsjussen. Vidare vil studiet bidra til kunnskapar om og ferdigheiter i å forvalte helse- og omsorgstenestene i kommunen.

Studiet vil også gi innsikt i dilemma ein ofte vert stilt ovafor i rolla som forvaltar av kommunen si myndigheit og bidra til å styrke evne til refleksjon og problemløysing.
Forutan sentrale helserettslege tema og skjønnsutøving i høve til tildeling, endring og bortfall av helse- og omsorgstenester, vil vi denne gongen fokusere særskilt på:

– utfordringar knytta til Samhandlingreformen
– samanhengen mellom tildelingsvedtak, ressursstyring/ressursbruk og tjenesteyting
– BPA-brukarstyrt personleg assistanse.

SAMLINGAR PÅ HØGSKULEN I VOLDA

Undervisninga er organisert over tre samlingar. Det vil vere ei samling hausten 2015 og to samlingar våren 2016. I tillegg vert det lagt til rette for diskusjons­grupper og fagleg samhandling på nett. Du vil ta del i føre­lesingar og gruppe­arbeid. Det blir lagt opp til sjølv­studium og oppgåve­skriving mellom samlingane. Det er knytt rettleiing til oppgåveskrivinga. Studentane blir delt inn i basis­grupper for fagleg samarbeid. Du vil få tilgang til eit elektronisk klasserom (Fronter) der informasjon og fagstoff blir tilgjengeleg.

– Ressurssituasjonen og ikkje minst Samhandlingsreformen gir utfordringar som gjer at god juridisk kompetanse er veldig viktig. Folk flest og pårørande har høgare forventingar til vår kunnskap og er meir bevisste på kva dei har krav på og difor må vi kunne meir enn før. Vi er glad for å ha fått auka kompetanse på området og har god bruk for det. Vi nytter pensum mykje i jobben og opplever at vi bruker lovverket breiare enn før, Linda Tryggestad Søvik og Møyfrid Kleppe Bakke, Sykkylven kommune.