Godt opptak

- Vi har sendt tilbod til 1174 søkjarar i Samordna opptak, noko som er om lag like mange som i fjor. I tillegg har vi ein god auke i lokalopptaket, seier studiedirektør Gonnie Smith.  

Høgskulen i Volda har også i år ein ytterlegare auke i søkninga til sosialfaga, og det gjeld både barnevernspedagog- og sosionomutdanninga. Dette har ført til at poenggrensa har gått opp. Idrettsfaga ved høgskulen blir også stadig meir populære og kan vise til ein fin auke. Mediefaga har som tidlegare år gode opptakstal der fleire av utdanningane har ventelister.

- Vi har også gitt fleire tilbod på grunnskulelærarutdanningane enn i fjor, men det er framleis nokre ledige studieplassar, konstaterer høgskuledirektør Jacob Kjøde jr. 

Auke i lokalopptaket
Høgskulen kan vise til ein auke i lokalopptaket, både på nett- og masterstudium. Mellom anna vidareutdanning for lærarar i RLE, norsk og engelsk har hatt ein auke samanlikna med i fjor.

-  Det er svært gledeleg at stadig fleire vel å vidareutdanne seg ved Høgskulen i Volda, seier Jacob Kjøde jr. 

Framleis ledige studieplassar
Høgskulen i Volda har ledige studieplassar på eit utval bachelor- og yrkesutdanningar, årsstudium, og deltid/nettstudium. Fullstendig oversikt over dei ledige studieplassane finn ein her.